It, qarý-jaraq, jyljymaıtyn múlik — Byltyr memleketke jasalǵan syılyqtar

ASTANA. KAZINFORM — Qarjy mınıstrligi ótken jyly respýblıka menshigine berilgen syı-sııapatty atady.

Vedomstvo memleketke berilgen syılyqtyń múlikke quqyq alý qaǵıdasyna sáıkes (QR Úkimetiniń 2011 jylǵy 28 qyrkúıektegi 1103 qaýlysy) respýblıkalyq nemese kommýnaldyq menshikke beriletinin aıtty.

«2023 jyly jeke jáne memlekettik emes zańdy tulǵalardan syıǵa respýblıkalyq menshikke jyljymaıtyn múlik obektileri, kólik quraldary, aqparattyq júıeler, janýarlar (ıtter), qarý-jaraq, kompıýterlik tehnıka, jıhaz, aktsııa jáne jaýapkershiligi shekteýli seriktestiktiń jarǵylyq kapıtalyndaǵy qatysý úlesi berildi», — degen jaýap keldi mınıstrlikten redaktsııanyń resmı saýalyna.

Sondaı-aq, aqparatta memlekettik emes zańdy jáne jeke tulǵalarmen syıǵa tartý shartyn ýákiletti organ jasap, qabyldaıtyny aıtylǵan.

Al memleketke berilgen aktsıonerlik qoǵam aktsııalary jáne jaýapkershiligi shekteýli seriktestik jarǵylyq kapıtalyna qatysý úlesin satyp alý týraly sheshimdi Úkimet qabyldaıdy.

Eger múlik kommýnaldyq menshikke berilse, syıǵa tartý shartyn jasasý jónindegi sheshimdi jergilikti atqarýshy organdar qabyldaıdy.

Eske salsaq, ótken aptada Qarjy vıtse-mınıstri Erjan Birjanov memleketke syıǵa tartylǵan Bentley Bentayga kóligi týraly aıtyp bergen edi.