IT eksportynyń kólemi 1,1 mlrd dollarǵa jetti – Oljas Bektenov
ASTANA.KAZINFORM – Elimizde tsıfrlandyrý jáne JI salalary qarqyndy damyp keledi. Bul jóninde QR Úkimetiniń jáne QR Joǵary aýdıtorlyq palatasynyń 2025 jylǵy respýblıkalyq bıýdjettiń atqarylýy týraly esebin bekitý jóninde QR Parlamenti Palatalarynyń birlesken otyrysynda Premer-mınıstr Oljas Bektenov málimdedi.
– Memleket basshysynyń tapsyrmasy boıynsha, elimizde qazirgi tańda tsıfrlandyrý jáne jasandy ıntellektini engizý baǵyttarynda aýqymdy jumystar atqarylyp jatyr. Eń bastysy, zamanaýı quqyqtyq negiz qalyptastyryldy, ıaǵnı tsıfrlyq kodeks, jasandy ıntellekt týraly zań qabyldandy. Búgingi múmkindikti paıdalana otyryp, Parlament depýtattaryna osy baǵyttarda atqarylǵan aýqymdy birlesken jumysy úshin alǵysymdy aıtamyn. Sonymen qatar Memleket basshysynyń jarlyǵymen, Digital Kazakhstan jalpyulttyq strategııasy bekitildi jáne Prezıdenttiń sheshimi boıynsha, bıyl tsıfrlandyrý jáne jasandy ıntellekt jyly dep jarııalandy, – dedi ol.
Premer-mınıstrdiń sózinshe, maman daıarlaý – óte mańyzdy másele. AI Sana baǵdarlamasy sheńberinde 1 mıllıonnan astam adam jasandy ıntellektimen jumys isteý negizderine oqytyldy. Bul baǵyttaǵy jumystar mektepterde, joǵary oqý oryndarynda ary qaraı jalǵasady.
Sonymen birge Oljas Bektenov IT eksporty máselesine toqtaldy.
– IT eksporty – ekonomıkamyzdyń óte mańyzdy bóligi. 2025 jyly IT eksportynyń kólemi 1,1 mlrd dollarǵa jetti. Bul jaqsy nátıje dep aıtýǵa bolady. Mysaly, 2024 jyly bul kórsetkish 690 mln dollar boldy, ıaǵnı bir jyl ishinde 60% ósti, – dedi ol.
Soǵan qaramastan aldaǵy jumystar óte aýqymdy.
– Jaıbaraqat otyrýǵa bolmaıdy. Naryqtaǵy báseke kúnnen- kúnge kúsheıip bara jatyr. Bizge de belsendi, pármendi sharalar qabyldaý kerek, – dedi Oljas Bektenov.
Aıta keteıik, buǵan deıin elde jasandy ıntellekt boıynsha halyqaralyq aına zerthanasy qurylatynyn jazǵanbyz.
