Ystyqkóldiń túbinen Atlantıdaǵa uqsas kóne qala tabyldy
ASTANA. KAZINFORM — Qyrǵyzstanda Ystyqkóldiń túbinen arheologtar Atlantıdaǵa uqsas ejelgi qalanyń ornyn anyqtady. Bul týraly Kazinform agenttiginiń Bishkektegi menshikti tilshisi habarlady.
Econews málimetinshe, súńgýirler men arheologtar sýasty ekspedıtsııasy barysynda Torý-Aıgyr mańyndaǵy sý basqan aýmaqty zerttep, ortaǵasyrlyq qonystyń bolǵanyn rastaǵan.
Ekspedıtsııa esebinde zertteýshiler Ystyqkól sýynyń astynda qalǵan kirpishten salynǵan ǵımarattar men pesh qaldyqtaryn sıpattaǵan. Sonymen qatar keramıka synyqtary, janýar súıekteri jáne metaldy óńdeýden qalǵan shlak qaldyqtary tabylǵan.
Ǵalymdar borpyldaq qum astynan adam áreketiniń izderi saqtalǵan mádenı qabatty — topyraqtyń erekshe qabatyn anyqtaǵan. Bul olja adamdardyń osy aýmaqta uzaq ýaqyt boıy qurylys salyp, qaıta jańǵyrtyp otyrǵanyn, keıinnen bul jerdi sý basqanyn kórsetedi.
Qıraǵan ǵımarattardyń janynan, shamamen 5 metr tereńdikte, arheologtar XIII–XIV ǵasyrlarǵa jatatyn musylman qorymyn da zerttegen. Ondaǵy jerleý oryndary dástúr boıynsha Mekke baǵytyna qaratylyp ornalastyrylǵan.
Zertteýshilerdiń negizgi boljamy boıynsha, qala XV ǵasyrdaǵy kúshti jer silkinisiniń saldarynan sý astynda qalǵan.
Buǵan deıin Shveıtsarııa kólinen 2000 jyl burynǵy kemeniń júgi tabylǵan bolatyn.
