Ystyqkóldegi selden 16 úıdi sý basyp, kópir qırady

ASTANA. KAZINFORM – Qyrǵyzstanda Ystyqkól jaǵalaýynyń keıbir aýdandarynda jaýyn-shashyn saldarynan sel júrip, 16 jer úıdi sý basyp, kópir qırady.

Qyrǵyz Respýblıkasy Tótenshe jaǵdaılar mınıstrliginiń málimetinshe, 11 tamyzda Cholpon-Ata qalasynyń Toǵyz-Bulaq aýdanynda 4 turǵyn úıdi, Baktýý-Dolonotý aýylyndaǵy 9 úıdi sý basyp ketken. Sondaı-aq Bulan-Sogotý aýylynda 1 úı, Bosteri aýylynda 3 úıge zaqym kelgen. Kópir qırap, Bosteridegi «Qurylys kooperatıvi» saıajaıyna aparatyn joldy sý shaıyp ketken.

Qutqarýshylar otbasyn Baqtý-Dolonotý aýylynan ýaqytsha qaýipsiz jerge kóshirdi.

Oqıǵa ornynda Ystyqkól oblysynyń tótenshe jaǵdaılar departamentiniń qyzmetkerleri qolaısyz aýa raıynyń saldaryn joıý úshin jedel shtab qurdy. Sondaı-aq, Tótenshe jaǵdaılar mınıstrliginiń Azamattyq qorǵaý qyzmetteri jol, aryq júıelerin tazartyp, apattyń saldaryn joıý jumystaryn júrgizip jatyr.

12 tamyz kúngi tańǵy saǵat 4:20-daǵy jaǵdaı boıynsha №31 jáne №35 oblystyq bólimshelerden 29 qutqarýshy, eki motopompa, Tótenshe jaǵdaılar mınıstrliginiń Ystyqkóldegi oblystyq departamentinen tórt qyzmetker, jeti qutqarýshy tartyldy. Balyqshydaǵy sel saldaryn joıýǵa Ystyqkóldegi №19 qalalyq bólimshe jumyldyryldy.

Oqıǵa ornynda barlyǵy 40 qutqarýshy men úsh motopompa jumys istep jatyr. Ystyqkól oblysynyń azamattyq qorǵanys qyzmetterinen 60 adam jumyldyryldy.