Ystyqkólde jyl boıy jumys isteıtin jańa kýrort salynady
ASTANA. KAZINFORM — Qyrǵyzstannyń Ystyqkól oblysynda jańa «Ala-Too Rezort» taý-shańǵy kýrorty salynady, ol Jyrǵalan, Aq-Bulak jáne Boz-Ýchýk taý massıvterin biriktiredi, dep jazady Kabar.
Jańa kýrort jyl saıyn 2 mıllıon týrıst qabyldaıdy dep josparlanǵan. Bolashaqta Ortalyq Azııadaǵy eń iri taý-shańǵy kýrortyna aınalatyn keshenniń ınfraqurylymy tolyǵymen memlekettik qarjylandyrý esebinen salynady. Trassalardyń jalpy uzyndyǵy 250 shaqyrym bolady.
Prezıdent Sadyr Japarovtyń aıtýynsha, Jyrǵalan aýdanynda birinshi arqanjoldyń qurylysy 2026 jyldyń shilde aıynda aıaqtalady. 2026 jyldyń qarasha-jeltoqsanynda birinshi kezeń (Jyrǵalan) iske qosylyp, shańǵy trassalary jumys isteı bastaıdy. Birinshi kezeńge qajetti qarjy memleket tarapynan bólingen.
Ekinshi kezeńniń (Aq-Bulak) aıaqtalýy 2027 jylǵa josparlanǵan. Al úshinshi kezeń (Boz-Ýchýk) 2028 jylǵa deıin aıaqtalatyn bolady, bul rette trassalar birtutas júıege biriktiriledi.
Prezıdent atap ótkendeı, jaqyn arada qonaqúıler, meıramhanalar jáne basqa da nysandar qurylysyn salý úshin jer ýchaskeleri aýktsıonǵa shyǵarylady. Aýktsıonnan túsken qarjy ekinshi jáne úshinshi kezeńderge jumsalady. Birinshi kezeń úshin qarjy memleketten bólingen.
— Respýblıkalyq bıýdjetti júktemeı, qalǵan kezeńderdi jer satý arqyly qarjylandyramyz. Aýktsıon jeńimpazdaryna eki jyl ishinde nysandy salyp, paıdalanýǵa berý mindettemesi qoıylady, — dedi Japarov.
«Qyrǵyz Kýrshevel» memlekettik kásipornynyń dırektory Jarqynbek Maqsutov qazirgi ýaqytta táýelsiz baǵalaýshylar Ystyqkól oblysynda satylatyn jerlerdiń qunyn anyqtap jatqanyn málimdedi. Baǵalaý nátıjeleri apta sońynda belgili bolady.
Aýktsıon maýsym aıynyń birinshi jartysynda ashyq formatta onlaın ótedi. Aýktsıonǵa memlekettik kompanııalar, sheteldik ınvestorlar jáne Qyrǵyzstan azamattary — zańdy tulǵalar men jeke tulǵalar qatysa alady.
Kýrorttyń iske qosylǵannan keıin el ekonomıkasyna edáýir paıda ákeletini kútilip otyr.
Qyrǵyzstannyń Qurylys, sáýlet jáne turǵyn úı-kommýnaldyq sharýashylyq mınıstri Nurdan Orýntaev jobany júzege asyrý úshin Frantsııadaǵy Kýrshevel taý-shańǵy kýrortyn kórip qaıtqanyn aıtty.
— Frantsýz kýrortynyń qurylymyn kórgen soń, jobamyzdyń 30-40%-yn qaıta qarap, ózgerister engizdik. Biz kýrortty tek qysqy emes, jazǵy týrızm úshin de paıdaly etýdi josparlap otyrmyz. Ystyqkól oblysynda ornalasqandyqtan, bul kýrort jyl boıy tartymdy bolady, — dedi Orýntaev.
Osydan buryn Ystyqkólde aqqýlardyń jappaı qyrylý deregi tirkelgenin jazǵanbyz.