Ystyqkólde jantúrshigerlik jol apaty: 6 adam qaza taýyp, 3 adam aýrýhanaǵa tústi
ASTANA. KAZINFORM – Ystyqkól oblysynda iri jol-kólik oqıǵasy tirkeldi. Jantúrshigerlik jol apatynan 6 adam qaza taýyp, 3 adam aýrýhanaǵa jetkizildi. Bul týraly Kabar agenttigi jazdy.
Málimetke sáıkes, apat Balyqshy–Ananevo–Qarakól tasjolynda bolǵan. Batystan shyǵysqa qaraı baǵyt alǵan «Mercedes-Benz E420» avtokóliginiń júrgizýshisi joldyń sol jaǵynan burylyp shyqqan «Volkswagen Passat» kóliginen qashpaq bolyp, qarsy baǵytta kele jatqan «Renault Samsung SM6» avtokóligimen soqtyǵysqan.
Saldarynan «Mercedes-Benz E420» jáne «Renault Samsung SM6» kólikteriniń júrgizýshileri oqıǵa ornynda qaza tapqan.
Atalǵan oqıǵa Ystyqkól oblystyq ishki ister basqarmasynda tirkelip, tergeý qyzmeti tarapynan tıisti saraptamalar taǵaıyndalyp, tekserý jumystary júrgizilip jatyr.
Sonymen qatar Qyrǵyzstannyń Densaýlyq saqtaý mınıstrligi «Kabar» agenttigine jol apatyna barlyǵy 11 adam ushyraǵanyn málimdedi. Olardyń altaýy kóz jumsa, eki adam ambýlatorlyq em alýǵa jiberilgen. Taǵy úsh naýqas aýrýhanaǵa jatqyzylǵan.
– Aýrýhanada jatqan úsh naýqastyń biri — 2 jastaǵy sábı, ol Bishkektegi Ana men balany qorǵaý ulttyq ortalyǵyna aýystyryldy. Qalǵan eki naýqas aýyr jaǵdaıda jansaqtaý bóliminde jatyr. Olarǵa operatsııa jasalǵan. Ekeýi de jasandy tynys alý apparatyna qosylǵan, — dep habarlady mınıstrlik.
Eske sala ketsek, Astana – Qaraǵandy – Almaty tas jolynda bolǵan jol apatynan úsh adam qaza tapqanyn jazdyq.
