Ystyqkól jaǵalaýynda jańa bes juldyzdy «Qazaqstan» shıpajaıy salynyp jatyr
ASTANA.KAZINFORM - Ystyqkól jaǵalaýynda jańa bes juldyzdy «Qazaqstan» shıpajaıynyń qurylysy jalǵasyp jatyr. Shıpajaıdy iske qosý bıylǵy qarasha aıyna josparlanǵan. Paıdalanýǵa berilgennen keıin shıpajaı jyl on eki aı jumys istep, bir mezette 180 adamǵa deıin qabyldaı alady.
«Qazaqstan» shıpajaıy Ystyqkólde alǵash ret 1962 jyly ashylyp, ondaǵan jyldar boıy demalys pen saýyqtyrýǵa arnalǵan tanymal oryndardyń biri boldy. Qazir nysan jańa kezeńge qadam basyp jatyr. Aýmaǵy shamamen 17,5 gektar jerde jańartylǵan ınfraqurylymy bar zamanaýı kópsalaly emdeý-saýyqtyrý kesheni salynyp jatyr.
Shıpajaı quramyna negizgi ǵımarat pen kottedjder kiredi. Demalýshylar úshin emdeý korpýsy, sporttyq-saýyqtyrý kesheni, jabyq basseın, mıneraldy jáne tuşy sýy bar ashyq basseınder, sport alańdary, velojoldar, meıramhanalar, kofehanalar, konferents-zal men kınoteatr qarastyrylǵan. Sonymen qatar munda balshyqpen emdeý, sýmen emdeý, fızıoterapııa, ıne refleksoterapııasy jáne medıtsınalyq ońaltýdyń basqa da túrleri qoljetimdi bolady. Shıpajaıdyń negizgi tabıǵı emdik faktorlary retinde Ystyqkóldiń klımaty, termomıneraldy sýy jáne Qarakól kóliniń emdik balshyǵy paıdalanylmaq.
Joba aıasynda jumys oryndaryn ashýǵa da erekshe kóńil bólinip otyr. Shıpajaı iske qosylǵannan keıin shamamen 260 adamdy jumyspen qamtý josparlanyp otyr. Ujymnyń basym bóligin jergilikti turǵyndar.
– Ystyqkól qazaqstandyqtar úshin dástúrli demalys baǵyttarynyń biri bolyp qala beredi. Biz «Qazaqstan» shıpajaıynyń tek em alyp qana qoımaı, kól jaǵasynda otbasymen tolyqqandy demalatyn orynǵa aınalǵanyn qalaımyz. Jańa keshen qonaqtardy jyl boıy qabyldaýǵa múmkindik beredi, al qyzmet kórsetý deńgeıi men medıtsınalyq baza zamanaýı talaptarǵa saı bolady, – deıdi shıpajaı dırektory Ernaz Omarhanov.
Qazaqstan Kompartııasy Ortalyq komıtetiniń birinshi hatshysy Dinmuhamed Qonaev demalǵan saıajaı áli kúnge deıin saqtalǵan. Bul nysan shıpajaı tarıhynyń bir bóligi sanalady. Qazir ǵımaratty qaıta jańǵyrtý jumystary júrgizilip, aldaǵy ýaqytta munda mýzeı-úı ashý josparlanyp otyr.
Jańartylǵan shıpajaı iske qosylǵannan keıin Qyrǵyzstan, Qazaqstan jáne ózge de óńir elderinen keletin týrısterdi qabyldaı alady dep josparlanǵan.
Aıta keteıik, múgedektigi bar adamdar úshin shıpajaılyq-kýrorttyq emdeýdi akkredıtteýdi mindetteý usynyldy.
