Ystanbuldaǵy jer silkinisinen keıin qala syrtyndaǵy úılerge suranys kúrt artty
ASTANA. KAZINFORM – Túrkııanyń eń úlken megapolısi Ystanbulda jer silkinisinen soń qaýipsiz baspana men qala shetindegi úılerge degen suranys kúrt artty, dep habarlaıdy Kazinform agenttiginiń menshikti tilshisi.
Ystanbulda 23 sáýir kúni bolǵan 6.2 baldyq jer silkinisi qala turǵyndarynyń baspanaǵa degen kózqarasyn aıtarlyqtaı ózgertti. Megapolıstiń kóptegen turǵyndary kópqabatty úılerden bas tartyp, balamaly, seısmıkalyq jaǵynan qaýipsizdeý turaq izdeýge kóshti.
Osyǵan qaraı qala shetindegi qópqabatty emes, shaǵyn jáne mobıldi úılerge, jer telimderine degen suranys artty.
Jyljymaıtyn múlik jónindegi sarapshy Mýstafa Hakan Ozelmadjıklynyń aıtýynsha, qurylys júrgizýge ruqsat etilmegen jer telimderiniń sharshy metriniń quny 3-ten 5 myń túrik lırine (45 myńan 75 myń teńgege) deıin jetedi. Al qurylys salýǵa ruqsat etilgen jer telimderiniń quny 10 myńnan 15 myń lırge (140 myńnan 295 myń teńgege) deıin barady.
Bul rette ol aýyl sharýashylyǵyna arnalǵan jerlerge konteınerler men tez salynatyn mobıldi úılerdi ornalastyrýǵa arnaıy ruqsat kerek ekenin atap ótti.
Statsıonarlyq úılerden basqa avtokerýender «dóńgelegi bar úıshikter» keń suranysqa ıe. Bularǵa turǵyndar dástúrli baspanadan kóri qaýipsiz ári jaqsy balama retinde qaraıdy.
Mundaı úılerge degen baǵa jaılylyǵy men jabdyqtalýyna baılanysty 160-tan 15 mln lırge (2 mln-nan 205 mln teńgege) deıin jetedi. Osylaısha jaqynda bolǵan tabıǵı apattan keıin Ystanbul turǵyndary burynǵydan qaýipsiz ári táýelsiz ortany izdeı bastady.
Osyǵan deıin Ystanbulda bolǵan jer silkinisinen 4 200-den astam ǵımarat búlingeni týraly jazdyq.