Ystanbuldaǵy túngi klýbqa granata laqtyryldy: zardap shekkender bar

ASTANA. KAZINFORM — Ystanbuldyń eýropalyq bóliginde ornalasqan Kıagıthane aýdanynda túnde klýbtardyń birine qarýly shabýyl jasaldy, dep habarlaıdy Kazinform tilshisi. 

Quqyq qorǵaý organdarynyń málimetinshe, sol kezde kelýshiler júrgen ǵımaratqa belgisiz bireýler qol granatasyn laqtyrǵan.

Jarylys saldarynan jeti adam zardap shekti. Olardyń úsheýiniń jaǵdaıy aýyr dep baǵalanyp otyr. Zardap shekkender tez arada jaqyn mańdaǵy aýrýhanalarǵa jetkizildi, olarǵa áli de medıtsınalyq kómek kórsetilip jatyr.

Oqıǵa ornyna dereý polıtsııa kúshteri, arnaıy jasaq jáne jedel járdem brıgadalary jetti. Aımaq áli qorshaýǵa alynǵan, tergeý júrip jatyr. Tergeý organdary men qaýipsizdik qyzmetkerleri beınebaqylaý kameralarynyń beınejazbalaryn zerttep, oqıǵa kýágerlerinen jaýap alyp jatyr. 

Shabýyldyń sebepteri áli belgisiz. Bılik ókilderi lańkesterdiń qatysy baryn, qylmystyq tóbelesti de joqqa shyǵarmaıdy. Bılik oqıǵanyń egjeı-tegjeıin bastapqy tergeý aıaqtalǵan soń jarııalaýǵa ýáde berdi.

Qala turǵyndary megapolıstegi zorlyq-zombylyqtyń ósýine alańdaýshylyq bildirip, ásirese qoǵamdyq jáne oıyn-saýyq oryndarynda qaýipsizdik sharalaryn kúsheıtýdi talap etip otyr.

Osyǵan deıin Túrkııa qonaqúılerdiń jappaı jabylýy týraly qaýesetti joqqa shyǵarǵanyn jazdyq.