Ystanbuldaǵy sý tasqynynan qaza tapqandar sany tórt adamǵa jetti
ASTANA. KAZINFORM — Ystanbulda nóser jaýyn saldarynan aýqymdy sý tasqyny bolyp, kólik qozǵalysy buzyldy, turǵyn úıler men aýrýhanalardy sý basty. Bul týraly Kazinform agenttiginiń Ankaradaǵy menshikti tilshisi habarlaıdy.
Túrkııanyń Milliyet basylymynyń málimetinshe, Ystanbulda tolassyz jaýǵan jańbyr saldarynan tórt adam qaza taýyp, taǵy jeti adam aýrýhanada em qabyldap jatyr. Túrkııa bıliginiń deregine sáıkes, qalanyń jekelegen aýdandarynda jaýyn-shashyn mólsheri sharshy metrine 272 mıllımetrge jetken.
Sý tasqyny megapolıstiń birneshe aýdanyn qamtydy. Sý turǵyn úılerge, aýrýhanalarǵa, saýda ortalyqtary men metro stantsııalaryna kirgen. Sý basqan joldarda kólikter turyp qaldy, al qolaısyz aýa raıy áýejaılardyń jumysyna kedergi keltirdi. Altyn Múıiz shyǵanaǵyndaǵy sý nóserden keıin qońyr túske boıalǵan.
Beıkóz aýdanynda salynyp jatqan mektep aýmaǵyndaǵy qudyqtan sýdy soryp shyǵaryp jatqan jumysshy Faık Shentúrk qudyqqa qulap, qaza tapty. Saryer aýdanynda Kıagythane ózeni arnasynan tasyp shyqqan. Kópir astynan aýdarylǵan kólik tabyldy. Al Kıagythane aýdanyndaǵy Sadabad saıabaǵy mańynan Aıazaga aýdanynan sý aǵynymen aǵyp ketken bolýy múmkin er adamnyń denesi tabyldy.
Túrkııanyń ishki ister mınıstri Mustafa Chıftchıdiń málimetinshe, Ystanbulda qolaısyz aýa raıyna baılanysty 8 815 ótinish tirkelgen. Qutqarý qyzmetteri sý basqan aýmaqtardan 2 727 adamdy evakýatsııalady. Qalada túrli vedomstvolardyń 46,5 myńnan astam qyzmetkeri, 2,2 myńnan astam kólik quraly jáne 14 qaıyq jumyldyrylǵan. Qazir tabıǵı apat saldaryn joıý jáne keltirilgen shyǵyndy baǵalaý jumystary jalǵasyp jatyr.
Bılik Ystanbulda jáne Mármár teńizi óńirindegi basqa da provıntsııalarda taǵy da qatty jańbyr jaýýy múmkin ekenin eskertti. Qolaısyz aýa raıyna baılanysty Ystanbul mektepterinde sabaq eki kúnge, al birqatar basqa provıntsııada bir kúnge toqtatyldy.
Turǵyndarǵa ózen arnalaryna, sý basqan jerasty ótkelderine jáne basqa da qaýipti aýmaqtarǵa jaqyndamaý, sondaı-aq asa qajettilik bolmasa, jolǵa shyqpaý eskertildi.
Meteorologııalyq qyzmettiń boljamynsha, óńirde aldaǵy birneshe kúnde aýa raıy salqyn ári jańbyrly bolady.
Buǵan deıin nóser jaýyn men qolaısyz aýa raıyna baılanysty Ystanbulda mektepter jabylyp, mototsıkl qozǵalysyna tyıym salynǵanyn jazǵan bolatynbyz.
