Ystanbuldaǵy Reseı men Ýkraına kelissózi aıaqtaldy: qorytyndylar, kelispeýshilikter jáne jańa bastamalar

ASTANA.KAZINFORM  - Ystanbulda Reseı men Ýkraına delegatsııalarynyń eki saǵatqa sozylǵan kezdesýi aıaqtaldy, dep habarlaıdy Kazinform agenttiginiń menshikti tilshisi.

Túrkııanyń Syrtqy ister mınıstrligine silteme jasaǵan túrik BAQ-tarynyń habarlaýynsha taraptardyń kezdesýi aıaqtaldy. Kelissózder jabyq esik jaǵdaıynda ótti, sondyqtan naqty kelisim jarııalanǵan joq.

Kezdesýdiń basynda Túrkııa Syrtqy ister mınıstrliginiń basshysy Hakan Fıdan boldy. Onyń qatysýy ashylý sózimen shekteldi. Odan keıin Reseı jáne Ýkraına delegatsııalary deldalsyz talqylaýdy jalǵastyrdy.

Delegatsııalar arasyndaǵy qarym-qatynas tiline qatysty da keıbir belgisizdik bar. Keıbir BAQ taraptardyń aýdarmashy arqyly sóıleskenin jazsa, basqalary kelissózder orys tilinde júrgizilgenin aıtady.

Reuters agenttiginiń habarlaýynsha, Reseıdiń qoıǵan talaptary shekten tys jáne burynǵy kelissózderden alshaq. Bul elder arasyndaǵy alaýyzdyqtyń saqtalýyna ákelýi múmkin.

Ýkraına prezıdenti Vladımır Zelenskıı óziniń jańa joldaýynda kelissózder naqty ilgerileýsiz «teatr» bolyp shyqsa, Reseıge qarsy sanktsııalyq qysymdy kúsheıtýge shaqyrdy.

Sonymen birge, Ystanbul kezdesýiniń nátıjesine qatysty belgisizdik jaǵdaıynda Rım Papasy Lev XIV Vatıkandy kelissózderdiń kelesi raýndy úshin beıtarap oryn retinde usynýǵa daıyn ekenin málimdedi. Bul bastama Eýropanyń birqatar elinde dıalogty jalǵastyrýdyń tásili retinde qoldaý tapty.

Tikeleı kelissózderdiń qaıta jandanǵanyna qaramastan, retteýdiń keleshegi belgisiz jáne taraptardyń ustanymdary bir-birinen alshaq qalyp otyr.

Buǵan deıin Túrkııa Syrtqy ister mınıstrliginiń basshysy Hakan Fıdan Reseı men Ýkraına arasyndaǵy retteý jolyn tańdaý taraptardyń erkinde ekenin málimdegen.