Ystanbuldaǵy mektepte oqýshy qyz shabýyl jasady
ASTANA. KAZINFORM — Ystanbuldaǵy mektepterdiń birinde oqýshy qyz pyshaq ala júgirip, segiz adamdy jaraqattady, dep habarlaıdy Kazinform agenttiginiń Ankaradaǵy menshikti tilshisi.
Oqıǵa Ystanbuldyń Bashakshehır aýdanyndaǵy Kaıabashy eldi mekeninde ornalasqan Sheıh Shamıl atyndaǵy mektepte bolǵan. Aldyn ala málimet boıynsha, Kıýchıýkchekmedje aýdanyndaǵy mektepterdiń birinde 10-synypta oqıtyn qyz buryn bilim alǵan mektebine mektep formasymen kelip, oqýshylardy pyshaqtamaq bolǵan.
Habar túskennen keıin polıtsııa qyzmetkerleri men jedel járdem brıgadalary oqıǵa ornyna jetti. Jaraqat alǵandar aýrýhanaǵa jetkizildi. Túrkııanyń Densaýlyq saqtaý mınıstri Kemal Memıshoglý segiz zardap shegýshiniń ekeýi aýyr halde jatqanyn, olardyń biriniń jaǵdaıy óte aýyr ekenin málimdedi.
Túrkııanyń basylymy kúdikti qyzdyń buǵan deıin osy mektepte oqyǵanyn habarlady. Sondaı-aq onyń psıhologııalyq máselesi bolýy múmkin degen boljam bar.
Shabýyl bolǵanyn estigen oqýshylardyń ata-anasy mektep aldyna jınaldy. Olar oqý oryndaryna bógde adamdardyń erkin kire alatynyna alańdap, narazylyq bildirdi.
Oqıǵadan keıin mektep mańynda qaýipsizdik sharalary kúsheıtilip, tergeý bastaldy.
Buǵan deıin Túrkııada mektep muǵalimi qarýly shabýyldan qaza tapqanyn jazǵan edik.
