Ystanbuldaǵy Bedjek otbasynyń ólimi hımıkattardyń áserinen bolýy múmkin

ASTANA. KAZINFORM – Ystanbuldyń Fatıh aýdanynda qaza tapqan Bedjek otbasynyń ólimine qatysty tergeý jańa derektermen tolyqty. Aldyn ala sot-medıtsınalyq saraptama otbasynyń tamaqtan ýlanǵany týraly bastapqy boljamdy joqqa shyǵardy.

Saraptama qorytyndysyna sáıkes, Chıgdem Bedjek pen onyń balalary – Kadır Mýhammet jáne Masal, sondaı-aq keıin aýrýhanada kóz jumǵan ákesi Servet Bedjektiń ólimi qonaqúıde hımııalyq zattyń áserinen bolýy yqtımal.

Buǵan deıin otbasy Beshiktash aýdanyndaǵy meıramhanada keshki as ishken soń jaǵdaıy nasharlaǵan degen nusqa qarastyrylǵan edi. Alaıda toksıkologııalyq zertteýler taǵamdyq ýlanýǵa tán belgilerdi anyqtamady.

Qazir tergeý organdary qonaqúıdegi qaýipti zattardy zańsyz saqtaý nemese paıdalaný jáne ýly hımıkatty qasaqana qoldaný sııaqty nusqalardy tekserip jatyr. Qaıǵyly oqıǵa bolǵan qonaqúı ýaqytsha jabylyp, ǵımarattaǵy bólmeler men jeldetý júıelerine qosymsha saraptamalar júrgizilýde.

Oqıǵa Túrkııadaǵy qonaqúılerdiń qaýipsizdigine qatysty qoǵam arasynda keń talqylaý týǵyzyp, týrıstik aımaqtardaǵy qaýipsizdik standarttaryn qaıta qaraý qajettigin kórsetip otyr.

Túrik bıligi tergeýdiń tolyq ashyq júrgiziletinin málimdedi.

Buǵan deıin Ystanbul soty Fatıh aýdanynda Germanııadan kelgen týrısterdiń ólimine baılanysty is boıynsha ustalǵan 11 adamnyń tórteýin qamaýǵa alý týraly sheshim qabyldaǵan edi.