Ystanbuldaǵy aýa raıyna baılanysty ondaǵan reıs basqa áýejaılarǵa baǵyttaldy
ASTANA. KAZINFORM — Ystanbulda qatty jel men qolaısyz aýa raıy eki áýejaıdyń jumysyna kedergi keltirdi. Sonyń saldarynan ondaǵan reıs basqa áýejaılarǵa baǵyttaldy, dep habarlaıdy Kazinform agenttiginiń Ankaradaǵy menshikti tilshisi.
Túrkııanyń Kólik jáne ınfraqurylym mınıstrliginiń málimetinshe, 14 qazanda Ystanbul áýejaılaryna qona almaǵan 46 ushaq Túrkııadaǵy jáne sheteldegi qosalqy áýejaılarǵa jiberilgen.
Vedomstvo deregine sáıkes, Ystanbul áýejaıyna baǵyt alǵan 43 ushaq basqa áýejaılarǵa burylǵan. Atap aıtqanda, 16 reıs Ankaraǵa, 10 reıs Izmırge, segiz reıs Ystanbuldaǵy Sabıha Gókchen áýejaıyna baǵyttaldy. Taǵy birneshe ushaq Balykesır, Chanakkale jáne Antalıa qalalaryna jiberildi.
Túrkııadan tys jerlerde Bolgarııanyń Býrgas, Irannyń Tegeran jáne Grekııanyń Afıny qalalary qosalqy áýejaı retinde paıdalanyldy.
Qolaısyz aýa raıy Sabıha Gókchen áýejaıynyń jumysyna da áser etti. Qatty jel men jel baǵytynyń kúrt ózgerýine baılanysty ushaqtardy qondyrý ýaqytsha toqtatyldy. Al saǵat 21:42-den bastap ushaqtardyń áýege kóterilýine shekteý qoıyldy. Qona almaǵan úsh ushaq Ankara áýejaıyna baǵyttaldy.
Mınıstrliktiń habarlaýynsha, Sabıha Gókchen áýejaıynda ushaqtardy qabyldaý jáne jóneltý jumystary saǵat 22:02-de qaıta jandandy.
Buǵan deıin Ystanbulda nóser jaýyn saldarynan kósheler men turǵyn úılerdi sý basyp, jasóspirim qaza tapqanyn, mektepterdegi sabaqtar toqtatylǵanyn jazǵan edik.
Sońǵy derekterge sáıkes Ystanbuldaǵy sý tasqynynan qaza tapqandar sany tórt adamǵa jetkeni habarlandy.
