Ystanbulda jaqynda bolǵan jer silkinisinen 4 200-den astam ǵımarat búlindi
ASTANA. KAZINFORM – 23 sáýirde Ystanbulda bolǵan magnıtýdasy 6,2 baldyq jer silkinisinen myńdaǵan ǵımarat zaqymdanyp, júzdegen turǵyn medıtsınalyq kómekke júginýge májbúr boldy, dep habarlaıdy Kazinform menshikti tilshisi.
Túrkııanyń Qorshaǵan orta jáne qalalyq josparlaý mınıstri Murat Kýrýmnyń aıtýynsha, barlyǵy 36 425 ǵımarat tekserildi, onyń 4 295-i azdap zaqymdalǵan bolyp shyqty. Keltirilgen shyǵyndar baǵalanyp jatyr.
Jerasty dúmpýleriniń oshaǵy Mármár teńizinde, eldiń eń iri megapolısine jaqyn jerde ornalasqan. Eń kúshti dúmpý 13 sekýndqa sozylyp, turǵyndar arasynda úreı týdyrdy. Jalpy alǵanda jer silkinisi bolǵan kúni jáne odan keıin ár túrli kúshtegi 300-ge jýyq aftershok tirkelgen.
Medıtsınalyq qyzmettiń habarlaýynsha, jeńil jaraqat alǵan 250-ge jýyq adam kómekke júgindi, olardyń kópshiligi shuǵyl evakýatsııalaý áreketi kezinde jaraqat alǵan, keıbir adamdar ǵımarat terezelerinen sekirgen.
Jergilikti bılik tabıǵı apattyń saldaryn baǵalaýdy jalǵastyryp, turǵyndar qaýipsizdigin qamtamasyz etý, sondaı-aq buzylǵan ınfraqurylymdy qalpyna keltirý sharalaryn qabyldap jatyr.
Buǵan deıin 23 sáýirde Ystanbulda birneshe jer silkinisi bolǵanyn jazǵan edik. Olardyń eń kúshtisiniń magnıtýdasy 6,2-ge jetti. Túrkııada jer silkinisinen 200-den astam adam zardap shekti.
Sheneýnikter Túrkııanyń seısmıkalyq belsendi aımaq ekenin jáne 2030 jylǵa qaraı Ystanbul aımaǵynda kúshti jer silkinisi bolý yqtımaldyǵy 64%-ǵa baǵalanatynyn eske saldy.
Aıta keteıik, Ystanbulda júrgen Abaı esimdi otandasymyz jer silkinisi qorqynyshty bolǵanyn aıtqan edi.
Eske sala ketsek, 2023 jyly Túrkııada jer silkinisinen qaza tapqandar sany 48 myńnan asty.
28 sáýirde Túrkııanyń shyǵys bóliginde 4,9 magnıtýdalyq jer silkinisi boldy.