Ystanbulda Túrkııa-AQSh-Ýkraına úshjaqty kezdesýi ótti
ASTANA. KAZINFORM — Kelissóz Túrkııa Syrtqy ister mınıstri Hakan Fıdannyń tóraǵalyǵymen bastaldy, dep habarlaıdy Anadoly.
Ystanbuldaǵy Dolmabahche prezıdenttik keńsesinde Túrkııa, AQSh jáne Ýkraına delegatsııalarynyń úshjaqty kezdesýi ótti.
AQSh delegatsııasyn Memlekettik hatshy Marko Rýbıo bastady. Amerıkalyq delegatsııa quramynda sondaı-aq AQSh-tyń Ankaradaǵy Elshisi Tom Barak pen prezıdent Donald Tramptyń Ýkraına boıynsha arnaıy ókili Kıt Kellog bar.
Ýkraına delegatsııasynyń quramynda Ýkraına prezıdenti keńsesiniń basshysy Andreı Ermak, qorǵanys mınıstri Rústem Ýmerov jáne syrtqy ister mınıstri Andreı Sıbıga bar.
Ýkraınadaǵy qaqtyǵysty retteýge kúsh salý
2022 jyly Reseı men Ýkraına arasyndaǵy qaqtyǵys bastalǵannan beri taraptar ony sheshýge birneshe ret talpynys jasady.
Kelissózdiń alǵashqy úsh raýndy Belarýste — 28 aqpanda Gomelde, al 3 jáne 7 naýryzda Brestte ótti, alaıda taraptar negizgi máseleler boıynsha kelisim jasaı almady.
2022 jyldyń 10 naýryzynda Antalııadaǵy Dıplomatııalyq forým alańynda Reseı jáne Ýkraına Syrtqy ister mınıstrlikteri basshylarynyń kezdesýi ótti, biraq odan eshqandaı ilgerileý bolǵan joq.
29 naýryzda Ystanbuldaǵy Dolmabahche saraıynda ótken kezdesý mańyzdyraq boldy, onda ýkraındyq delegatsııa reseılik tarapqa yqtımal kelisim jobasy men kepilger elderdiń tizimin usyndy. Alaıda 17 mamyrda Ýkraına kelissózdi resmı túrde toqtatty, al 4 qazanda Ýkraına prezıdenti Vladımır Zelenskıı Ulttyq qaýipsizdik jáne qorǵanys keńesiniń Reseı prezıdenti Vladımır Pýtınmen dıalog júrgizý múmkin emestigi týraly sheshimine qol qoıdy.
Dıplomatııalyq tyǵyryqqa qaramastan, 2022 jyly 22 shildede Ystambulda BUU men Túrkııanyń deldaldyǵymen Qara teńiz astyq bastamasy boıynsha kelisimge qol jetkizildi.
18 naýryzda AQSh prezıdenti Donald Tramp pen RF prezıdenti Pýtınniń telefon arqyly sóılesýinen keıin reseılik tarap energetıkalyq ınfraqurylymǵa shabýyldardan ózara bas tartý ıdeıasyn qoldady, kelesi kúni prezıdent Zelenskıı osyǵan uqsas sharalarǵa kelisimin berdi.
2025 jyldyń 11 mamyryna qaraǵan túni prezıdent Pýtın Ystanbulda Ýkraınamen aldyn ala shartsyz tikeleı kelissóz júrgizýdi usynǵan málimdeme jasady.
Túrkııa prezıdenti Rejep Taııp Erdoǵan kezdesýdi uıymdastyrýǵa daıyn ekenin bildirdi.
Tramp reseılik áriptesiniń Ýkraınamen tikeleı kelissózdi qaıta bastaý týraly usynysyn qoldady, al Zelenskıı 15 mamyrda Ystanbulda ótetin kelissózge qatysatynyn rastady.
Ystanbul beıbit kelissóziniń birinshi kúni, ıaǵnı 15 mamyrda Reseı Federatsııasy men Ýkraına delegatsııalarynyń tikeleı kezdesýi ótken joq.
Reseı delegatsııasynyń basshysy Vladımır Medınskıı Ystanbuldaǵy Reseı bas konsýldyǵy ǵımaratynyń aldynda tilshilerge bergen suhbatynda Kıevpen tikeleı baılanystyń maqsaty — qaqtyǵystyń túpki sebepterin joıý arqyly uzaq merzimdi beıbitshilik ornatý ekenin málimdedi. Onyń atap ótýinshe, reseılik tarap Ystanbuldaǵy beıbit kelissózdegi yqtımal ymyraǵa kelýdi talqylaýǵa daıyn jáne bul kezdesýdi 2022 jyly ótken beıbit kelissózdiń jalǵasy retinde qarastyryp otyr.
Ýkraına prezıdenti Zelenskıı Ankarada ótken baspasóz máslıhatynda Túrkııa prezıdenti Erdoǵanǵa qurmet retinde qorǵanys mınıstri Rústem Ýmerov bastaǵan Ýkraına delegatsııasyn Ystanbulǵa jibergenin málimdedi.
Keshke Túrkııa SІM basshysy Hakan Fıdan prezıdenttiń kómekshisi Vladımır Medınskıı bastaǵan reseılik delegatsııamen kelissóz júrgizdi.
16 mamyrda Dolmabahche saraıynda eki úshjaqty kezdesý josparlanǵan: jergilikti ýaqyt boıynsha saǵat 10:45–te Túrkııa, AQSh jáne Ýkraına arasyndaǵy kelissóz, al 12:30–da — Túrkııa, Reseı jáne Ýkraınanyń kezdesýi ótedi dep kútilip otyr.