Ystanbulda týrısterdiń neden ýlanǵany belgili boldy
YSTANBUL. KAZINFORM — Túrkııanyń Sot medıtsınasy ınstıtýty usynǵan tergeý esebi Bedjek otbasyna qatysty qaıǵyly oqıǵanyń mán-jaıyn anyq kórsetti, dep jazdy agenttiktiń menshikti tilshisi.
Túrkııanyń Sözcü basylymy jarııalaǵan málimetke sensek, Germanııadan demalysqa kelip, Stambuldyń Fatıh aýdanyndaǵy qonaqúıde turǵan otbasynyń ólimine ınsektıtsıd retinde qoldanylatyn ýly gaz – fosfınniń áser etýi negizgi sebep bolýy múmkin.
Tamaqtan ýlanbaǵan
Sarapshylar otbasy músheleriniń qany, ishki organdary, asqazanyndaǵy zattar, sondaı-aq olardyń jegen taǵamdary men ishken sýsyndarynyń úlgilerin muqııat zerttegen.
Barlyq synamalarda tamaqtan nemese hımııalyq zattardan ýlanýǵa tán izder anyqtalmaǵan.
Bul bastapqyda qarastyrylǵan – taǵamnan ýlaný nusqasyn joqqa shyǵardy.
Nómirden fosfın gazy tabyldy
Tergeýdiń sheshýshi sáti – otel bólmelerinen fosfın gazynyń izderiniń tabylýy boldy. Bul gaz alıýmınıı fosfıdi ylǵalmen áreketteskende bólinedi.
Keıbir qonaqúılerde jáne qoımalarda mundaı preparattardy jándikterdi ýlaý maqsatynda qoldaný talapqa saı bolmaıtyn jaǵdaılar kezdesedi. Tergeý osyny negizgi sebepterdiń biri retinde qarastyryp otyr.
Otbasy múshelerinde ýlanýdyń aıqyn belgileri anyqtaldy
Eresekter – Servet jáne Chıgdem Bedjek – fosfınmen ýlanýǵa tán belgiler kórsetken.
Balalar — Kadır men Masalda — gazdyń toksıkalyq áseriniń alǵashqy ári kúshtirek belgileri baıqalǵan.
Tergeý jalǵasady
Ólimniń naqty sebebi tolyq materıaldar zerttelgennen keıin anyqtalady. Tergeýshiler beınejazbalardy, kýágerlerdiń túsinikterin jáne naýqastardy emdegen klınıkalardyń medıtsınalyq qujattaryn tekseredi.
Sondaı-aq qonaqúıde dezınsektsııanyń durys júrgizilmeýi nemese kelisimsiz jasalýy saldarynan ýly gazdyń turǵyn bólmelerge taralýy múmkin be degen másele de qaralyp jatyr.
Buǵan deıin Stambul soty Germanııadan kelgen týrısterdiń ólimine qatysty is boıynsha ustalǵan 11 adamnyń tórteýin qamaýǵa alǵany habarlanǵan.
Jalpy, sońǵy ýaqytta Túrkııada taǵamnan ýlaný jaǵdaılary jıilep otyr.