Ystanbulda týrıster otbasynyń ólimine qatysty is boıynsha úkim shyqty
ASTANA. KAZINFORM — Ystanbulda týrıster otbasynyń qazasyna qatysty is boıynsha úkim shyqty, dep habarlaıdy DW.
Túrkııanyń Ystanbul qalasynda qonaqúıde ınsektıtsıdten ýlanyp qaza tapqan Germanııanyń Gambýrg qalasynan kelgen týrıster otbasy isi boıynsha sot úkim shyǵardy.
Sot alty aıyptalýshynyń tórteýine naqty bas bostandyǵynan aıyrý jazasyn taǵaıyndady. Zııankesterge qarsy óńdeý júrgizgen kompanııanyń ıesi men onyń uly 18 jyldan bas bostandyǵynan aıyryldy. Kompanııanyń taǵy bir qyzmetkeri 12 jyl 2 aıǵa, al qonaqúıdiń basqarýshysy 13 jyl 4 aıǵa sottaldy. Al qonaqúıdiń eki ákimshisi aqtaldy.
Sot otyrysyna qatysqan marqumdardyń týystary shyǵarylǵan úkimdi quptaǵan. Al aıyptalýshylardyń qorǵaýshylary bul oqıǵada qylmystyq nıet bolmaǵanyn aıtyp, olardy aqtaýdy talap etti.
Eske salaıyq, 2025 jyldyń qarasha aıynda Gambýrgten kelgen tórt adamnan turatyn otbasy Stambuldaǵy demalysy kezinde ýlaný belgilerimen aýrýhanaǵa jetkizilip, keıin kóz jumǵan bolatyn.
Bastapqyda jergilikti bılik týrıster kóshedegi taǵamnan ýlanǵan bolýy múmkin dep boljap, birneshe kóshe taǵamyn satýshyny ýaqytsha ustaǵan edi.
Alaıda keıin júrgizilgen saraptama olardyń fosfın gazynan ýlanǵanyn anyqtady. Bul ýly gaz qonaqúı bólmesin zııankesterden óńdeý kezinde qoldanylǵan.
Mamandardyń málimetinshe, fosfın gazymen ýlanǵan jaǵdaıda ólim-jitim kórsetkishi 40–80 paıyz jáne oǵan qarsy arnaıy ý qaıtarǵy joq. Eýropa elderinde, Túrkııadan aıyrmashylyǵy, fosfındi erkin satýǵa jáne paıdalanýǵa tyıym salynǵan.
Aıta ketelik Túrkııada azyq-túlikten ýlaný jaǵdaıy jıilep baratyny týraly jazǵan edik.
