Ystanbulda Reseı men Ýkraına kelissóziniń ekinshi raýndy aıaqtaldy
ASTANA.KAZINFORM - Reseı men Ýkraına ókilderiniń kezdesýi aıaqtaldy. Kelissózder Ystanbuldyń Chyragan saraıynda jabyq esik jaǵdaıynda ótti, dep habarlaıdy Kazinform agenttiginiń menshikti tilshisi.
Jalpy, eki memleket delegatsııalarynyń kezdesýi bir saǵattan sál astam ýaqytqa sozyldy. Kelissózge Túrkııa Syrtqy ister mınıstri Hakan Fıdan da qatysyp, Ankaranyń bitimgershilik protsesindegi deldaldyq rólin jalǵastyrýǵa daıyn ekenin rastady.
Kelissózge Reseı tarapynan prezıdenttiń kómekshisi Vladımır Medınskıı qatysty. Reseı delegatsııasynyń quramynda Syrtqy ister mınıstriniń orynbasary Mıhaıl Galýzın, Reseı Qarýly kúshteri Bas shtaby Bas basqarmasynyń bastyǵy Igor Kostıýkov jáne Qorǵanys mınıstriniń orynbasary Aleksandr Fomın boldy.
Ýkraına delegatsııasyn Qorǵanys mınıstri Rýstem Ýmerov basqardy. Oǵan sondaı-aq Syrtqy ister mınıstriniń birinshi orynbasary Sergeı Kıslıts jáne buryn Ýkraına prezıdenti Vladımır Zelenskıı bekitken basqa da resmı ókilder kirdi.
Kelissózderdiń bul raýndy osy jyldyń 15-16 mamyrynda bastalǵan dıalogtyń jalǵasy boldy. Ol kezde taraptar 2022 jyldan beri alǵash ret Dolmabahche saraıynda tikeleı kelissózder júrgizdi. Sol kezde birqatar aldyn ala kelisimderge qol jetkizildi. Onyń ishinde «1000-ǵa 1000» kelisimi boıynsha áskerı tutqyndar almasý, bolashaqta beıbit kelisimge kelý formýlasyn talqylaý, kelisimge kelý máseleleri qaraldy.
23-25 mamyr aralyǵynda taraptar qaqtyǵys bastalǵannan bergi eń iri tutqyn almasýdy sátti júzege asyrdy. Barlyǵy úsh kún ishinde ár tarap 900-den astam adamdy, onyń ishinde áskerı qyzmetkerlerdi de, beıbit turǵyndardy da aýystyrdy.
Reseı Syrtqy ister mınıstri Sergeı Lavrovtyń aıtýynsha, Máskeý ekinshi týrdy Ystanbulda ótkizýdi usynyp, Reseıdiń beıbit retteý prıntsıpterine degen kózqarasyn qamtıtyn memorandým daıyndady. Qujat áli jarııalanǵan joq.
Óz kezeginde Ýkraına tarapy óz memorandýmdarynyń nusqasyn usynyp úlgerdi. Onda tez arada atysty toqtatý jáne Qyrym, DHR, LHR, sondaı-aq Zaporoje jáne Herson oblystarynyń Reseıdiń bir bóligi retinde quqyqtyq mártebesin moıyndaýdan bas tartý sııaqty birqatar negizgi sharttar belgilengen.
Otyrystyń barysy men nátıjesi týraly áli resmı túsinik berilgen joq. Alaıda Túrkııada beıtarap platformada kelissózderdiń jańa raýndyn ótkizý faktisiniń ózi qaqtyǵysty dıplomatııalyq jolmen sheshý áleýetiniń jalǵasýynyń belgisi retinde qabyldanady.
Ystanbulda Reseı men Ýkraına arasyndaǵy kelissózderdiń ekinshi kezeńi bastalǵanyn jazǵan bolatynbyz.