Ystanbulda nóser saldarynan mektepter jabyldy
ASTANA. KAZINFORM — Nóser jaýyn men qolaısyz aýa raıyna baılanysty Ystanbulda mektepter jabylyp, mototsıkl qozǵalysyna tyıym salyndy, dep habarlaıdy Kazinform agenttiginiń Ankaradaǵy menshikti tilshisi.
Ystanbul bıligi nóserge baılanysty birqatar shara qabyldady. Qolaısyz aýa raıyn qalanyń kúndelikti ómirine áser etip, kólik qozǵalysyn qıyndatty.
Qala bıliginiń sheshimine sáıkes, 15 qazanda barlyq memlekettik jáne jekemenshik bilim berý mekemelerinde kúndizgi sabaqtar bir kúnge toqtatyldy.
Sonymen qatar, memlekettik sektor qyzmetkerleriniń keıbir sanattary ákimshilik demalys mártebesin saqtaı otyryp, jumystan bosatyldy. Atap aıtqanda, bul shara aıasynda múgedekter, júkti áıelder, ardagerler jáne segiz jasqa deıingi balalardy tárbıelep otyrǵan áıelder demalysqa jiberildi. Densaýlyq saqtaý, polıtsııa jáne apattardan keıingi kómek qyzmetterinde jumys isteıtin, segiz jasqa deıingi bala tárbıelep otyrǵan áıelder jumysyn jalǵastyrady. Al segiz jasqa deıingi múgedek balalardy tárbıelep otyrǵan áıelder, mamandyǵyna qaramastan, demalysqa jiberiledi.
Sondaı-aq, 14 qazanda saǵat 21:00-den bastap kelesi habarlamaǵa deıin mototsıklder men basqa da osyǵan uqsas eki dońǵalaqty kólikterge tyıym salynǵan.
Gýbernator bul sharalar qolaısyz aýa raıy jaǵdaılarynyń áserin azaıtýǵa jáne qala turǵyndarynyń qaýipsizdigin qamtamasyz etýge baǵyttalǵanyn atap ótti.
Buǵan deıin Ystanbulda qatty jańbyrdyń saldarynan kósheler men turǵyn úıler sý astynda qalǵany týraly habarlanǵan bolatyn. Sý tasqyny kólikterdi shaıyp ketti, al joldyń keıbir bólikterinde kólikter keptelip qaldy.
Keshe Ystanbulda nóser saldarynan myńnan astam úıdi sý basyp, 15 kóshkin júrgen.
