Ystanbulda qonaq úı týrısterdiń qazasynan keıin jabyldy

ASTANA.KAZINFORM - Ystanbulda bir qonaq úıden bir sátte birneshe adam asqazan aýrýyna shaǵymdanyp, aýrýhanaǵa tústi. Tergeýshiler qasaqana ýlaý bolýy múmkin degen málimdeme jasady, dep habarlaıdy Kazinform menshikti tilshisi.

Ystanbul bıligi bir otbasynan úsh birdeı adamnyń qazasy men ákesiniń aýrýhanaǵa jatqyzylýynan keıin Fatıh aýdanyndaǵy qonaq úıdi jaýyp tastady. Otbasy Germanııadan Túrkııaǵa demalysqa barǵan.

Polıtsııa 9 qarashada Bedjekter otbasy toqtaǵan qonaq úıdi baqylaýǵa aldy. Barlyq 15 qonaq shuǵyl túrde evakýatsııalanyp, basqa qonaq úılerge kóshirildi. Qonaq úı ıesi men uly jáne dezınfektsııalyq kompanııa qyzmetkeri tutqyndaldy, olar qonaqtar kelgenge deıin tórt kún buryn ǵımaratty zııankesterden tazartqan. Tergeýshiler qoldanylǵan hımııalyq zat aýaǵa tarap ketken bolýy múmkin dep kúdiktenedi.

Sonymen qatar, is boıynsha taǵy eki jábirlenýshi anyqtaldy: Italııa men Marokkodan kelgen týrısterdiń júregi aınyp, Taksımdegi klınıka dárigerleri olardyń jaǵdaıyn tez arada turaqtandyrdy.

AFAD sarapshylary ǵımarattaǵy sý men aýany tekserdi. Qazirgi ýaqytta lastaný anyqtalǵan joq, biraq toksıkologııalyq zertteýler jalǵasyp jatyr. Barlyǵy segiz adam ustaldy, onyń ishinde jaqyn mańdaǵy naýbaıhananyń ıesi jáne kóshedegi mıdııa satýshysy da bar, olardyń ónimderi de tekserilip jatyr.

Saraptama kezinde otbasy músheleriniń biriniń asqazany toksınderdiń nemese ótkir hımııalyq zat áserinen zaqymdanǵany anyqtaldy. Balalarda uqsas belgiler baıqalmady. Otbasy tek qonaq úı salqyndatqyshynan sý ishken.

Otaǵasy áli kúnge deıin jasandy tynys alý apparatynda jansaqtaý bóliminde jatyr, onyń jaǵdaıy turaqty. Polıtsııanyń arnaıy bólimi de qasaqana ýlaný múmkindigin tergep jatyr.

Aıta keteıik, Ystanbulda áıgili ártister men ánshiler esirtki daýyna ilikti.