Ystanbulda Qazaqstan azamaty mert boldy
ASTANA. KAZINFORM – Ystanbulda Qazaqstan azamaty úı shatyrynan qulap mert boldy. Bul aqparatty elimizdiń Syrtqy ister mınıstrligi rastady.
- SІM Ystanbulda Qazaqstan azamatynyń qaıtys bolǵany týraly habardar. Qazaqstandyq dıplomattar marqumnyń týystarymen baılanys ornatyp, olarǵa konsýldyq-quqyqtyq kómek kórsetip jatyr. Túrkııanyń quzyretti organdary tergeý júrgizip jatyr, oqıǵanyń mán-jaıy anyqtalýda. Bul másele Syrtqy ister mınıstrliginiń baqylaýynda, - dep atap ótti vedomstvodan.
Túrkııanyń DHA agenttigi taratqan aqparatqa qaraǵanda, oqıǵa keshe saǵat 09:15 shamasynda Ergenekon aýdanynda bolǵan.
Aldyn ala málimet boıynsha, Aısulý Bekmahanova ózi turatyn ǵımarattyń 6-qabatyndaǵy balkonnan kórshi úıdiń shatyryna ótip, shatyrdyń orta tusyna qaraı júrgen. Alaıda aıaǵynyń astyndaǵy shatyr paneli synyp, ol kópqabatty úıdiń ishki bos keńistigine qulaǵan.
Oqıǵa ornyna polıtsııa men jedel járdem qyzmetkerleri shaqyrylǵan. Medıtsına mamandary alǵashqy tekserý barysynda Aısulý Bekmahanovanyń qaıtys bolǵanyn anyqtaǵan.
Marqumnyń múrdesi prokýror men oqıǵa ornyn tekserý tobynyń jumysy aıaqtalǵannan keıin sot-medıtsınalyq saraptama mekemesiniń máıithanasyna jetkizilgen.
