Ystanbulda qazaq mádenıeti men dástúrleri tanystyryldy
ASTANA. KAZINFORM — Ystanbul Kent ýnıversıtetinde Túrkııada oqıtyn qazaqstandyq stýdentter arasynda dástúrli qazaq taǵamy — baýyrsaq daıyndaýdan aspazdyq saıys formatynda konkýrs uıymdastyryldy, dep habarlaıdy QR SІM baspasóz qyzmeti.
QR Ystanbuldaǵy Bas konsýldyǵynyń bastamasymen uıymdastyrylǵan is-sharaǵa Ystanbul, Ankara, Antalııa, Izmır jáne Býrsa qalalarynda bilim alatyn qazaqstandyq stýdentter qatysty.
Qazaqstan men Túrkııa arasyndaǵy mádenı baılanystardy nyǵaıtý maqsatynda uıymdastyrylǵan is-sharaǵa ǵylymı-akademııalyq qaýymdastyqpen qosa, jergilikti buqaralyq aqparat quraldarynyń ókilderi, sondaı-aq túrli elderden kelgen jastar jınaldy.
Іs-shara barysynda qonaqtar qazaqtyń eń keń taralǵan dástúrli taǵamdarynyń biri — baýyrsaqtyń dámin tatyp kórdi. Sonymen qosa, qazaq ashanasynyń ózge de ulttyq taǵamdary usynylyp, qatysýshylar dámin sezinip qana qoımaı, Qazaqstannyń baı mádenıetimen jaqynyraq tanysýǵa múmkindik aldy.
— Konkýrstyń negizgi maqsaty — baýyrlas Túrkııany dástúrli qazaq ashanasymen tanystyrýmen qatar, shyǵarmashylyq básekelestik arqyly dostyq pen ózara aýyzbirshilik atmosferasyn qalyptastyrý boldy. Árbir komanda baýyrsaqtyń dástúrli retseptteri men daıyndaý tehnıkasyn kórsetti, — delingen habarlamada.
Іs-sharanyń ashylýynda Qazaqstannyń Ystanbuldaǵy Bas konsýly Nýrıddın Amanqul jáne Ystanbul Kent ýnıversıtetiniń rektory Nedjmettın Atsý quttyqtaý sóz sóılep, mundaı sharalar baýyrlas qazaq-túrik halyqtary arasyndaǵy ózara túsinistikti nyǵaıtyp, ortaq dástúrlerdi tanytýda mańyzdy ekenin atap ótti.
Osydan buryn Ystanbulda Túrki memleketteri uıymy cyrtqy ister mınıstrleri keńesiniń beıresmı otyrysy ótkenin jazǵanbyz.
