Ystanbulda qaza tapqan qazaqstandyq qyzǵa qatysty SІM túsinikteme berdi
ASTANA. KAZINFORM — Qazaqstannyń Syrtqy ister mınıstrligi Ystanbul qalasynda 26 jastaǵy qazaqstandyq qyzdyń qaza tapqanyn rastady. Aldyn ala málimet boıynsha, ol balkonnan kórshiles ǵımarattyń shatyryna ótpek bolǵan kezde bıiktikten qulaǵan. Bul týraly QazAqparat agenttiginiń tilshisi habarlady.
Qazaqstan SІM-niń resmı ókili Janbolat Úsenovtiń aıtýynsha, qazaqstandyq dıplomattar marqumnyń týystarymen baılanysyp, olarǵa konsýldyq-quqyqtyq kómek kórsetip jatyr.
Oqıǵa 25 qazan kúni tańerteń Ystanbuldyń Shıshlı aýdanynda bolǵan. Túrkııalyq buqaralyq aqparat quraldarynyń habarlaýynsha, qyz altynshy qabattaǵy páterdiń balkonynan kórshiles ǵımarattyń shatyryna ótpek bolǵan. Aldyn ala boljam boıynsha, ol eki ǵımarattyń arasyndaǵy qalqaǵa basqan kezde, qurylym onyń salmaǵyna shydamaı, qyz ekinshi jerasty qabatynyń deńgeıine qulap ketken. Oqıǵa ornyna jetken medıtsına qyzmetkerleri onyń qaıtys bolǵanyn anyqtady.
Marqum Túrkııaǵa qyrkúıek aıynda týrıstik vızamen barǵan. Qazirgi ýaqytta qaıǵyly oqıǵanyń mán-jaıy Túrkııanyń quzyrly organdarymen birlesip anyqtalyp jatyr. Qazaqstan Syrtqy ister mınıstrligi jaǵdaıdy baqylaýda ustap otyr.
Eske salaıyq, qyrkúıek aıynyń sońynda Seýl qalasynda qurylys alańynda qazaqstandyq azamattyń qaza tapqany habarlanǵan edi.
