Ystanbulda IYU SІM keńesiniń 51-sessııasy ótedi

ASTANA. KAZINFORM – 21-22 maýsymda Túrkııanyń Ystanbul qalasynda «Ózgermeli álemdegi Islam yntymaqtastyq uıymy» taqyrybymen Islam yntymaqtastyq uıymynyń Syrtqy ister mınıstrleri keńesiniń 51-sessııasy ótedi. Bul týraly QR Syrtqy ister mınıstrliginiń resmı ókili Aıbek Smadııarov málimdedi.

– Sessııa jumysyna Qazaqstan Respýblıkasynyń Premer-mınıstriniń orynbasary – Syrtqy ister mınıstri Murat Nurtileý bastaǵan resmı delegatsııa qatysady, – dedi Aıbek Smadııarov.

Onyń aıtýynsha, is-shara aıasynda ıslam álemindegi qazirgi saıası ahýal, uıymǵa múshe memleketter arasyndaǵy ózara is-qımyldy nyǵaıtý, sondaı-aq saýda-ekonomıkalyq, mádenı jáne gýmanıtarlyq saladaǵy yntymaqtastyqty damytý máseleleri qarastyrylady.

– Sonymen qatar halyqaralyq qaýipsizdik pen qarýsyzdaný salasyndaǵy bastamalardy ilgeriletý, ıslamofobııa men dinı qundylyqtardy qorlaýǵa qarsy kúres taqyryptaryna erekshe nazar aýdarylatyn bolady, – dep naqtylady resmı ókil.

Aıbek Smadııarovtyń aıtýynsha, kún tártibindegi mańyzdy máselelerdiń biri – Uıymnyń ınstıtýtsıonaldyq reformasyn jalǵastyrý jáne qazirgi geosaıası jaǵdaıda onyń tıimdiligin arttyrýǵa baǵyttalǵan naqty sharalardy talqylaý bolmaq.

Buǵan deıin, Túrki memleketteri uıymynyń beıresmı sammıti qalaı ótkenin jazǵanbyz.