Ystanbulda germanııalyq týrısterdiń ólimine qatysty tórt kúdikti qamaýǵa alyndy

ASTANA. KAZINFORM – Ystanbul soty Fatıh aýdanyna Germanııadan demalýǵa kelgen týrısterdiń ýlaný saldarynan qaza bolýyna baılanysty ustalǵan 11 adamnyń tórteýin qamaýǵa alý týraly sheshim shyǵardy, dep habarlaıdy agenttiktiń menshikti tilshisi.

Tergeý birneshe nusqany qarastyryp otyr. Onyń ishinde taǵamnan ýlaný, sondaı-aq qonaqúıde dezınfektsııa kezinde qoldanylǵan ýly zattardyń áser etý yqtımaldyǵy bar.

Ystanbul sotynyń sheshimi boıynsha, qaza tapqan Bedjek otbasynyń ólimine qatysty tórt kúdikti – fastfýd pen lýkým satýshylary jáne týrıster tamaqtanǵan kafeniń ıesi qamaýǵa alyndy. Barlyǵy «abaısyzda adam ólimine ákep soqtyrý» babymen ustalǵan. Bul bap eń joǵary jaza retinde ómir boıyna bas bostandyǵynan aıyrýdy kózdeıdi.

Qaıǵyly oqıǵa 9 qarashada bolǵan. Germanııalyq otbasy Fatıh aýdanyndaǵy Harbour Suites Old City atty shaǵyn qonaqúıge ornalasqan. Aldyn ala derekter boıynsha, olar Beshiktashtaǵy bir dámhanada mıdııa men kartop jegennen keıin jaǵdaılary kúrt nasharlaǵan. Eki kishkentaı bala men anasy birneshe saǵat ishinde aýrýhanada kóz jumǵan. Dárigerler birneshe kún boıy ákeniń ómiri úshin kúreskenimen, ony da aman alyp qalý múmkin bolmady.

Polıtsııa men prokýratýra birqatar nusqalardy tekserip jatyr. Astan ýlaný nusqasymen qatar, qonaqúıdi sanıtarlyq óńdeý kezinde qoldanylǵan ýly zattardyń áser etý yqtımaldyǵy da qarastyrylýda.

Tergeýshiler otbasynyń alıýmınıı fosfıdinen ýlanýy múmkin ekenin joqqa shyǵarmaıdy. Bul – jándikterge qarsy qoldanylatyn, antıdoty joq, asa qaýipti hımııalyq zat. Onyń býlary joǵary kontsentratsııada kúshti ıntoksıkatsııa týdyryp, jyldam ólimge ákelýi múmkin.

Qazirgi ýaqytta tergeý jalǵasýda. Sarapshylar naqty ýlaný sebebin anyqtaıtyn toksıkologııalyq taldaýdyń nátıjelerin kútýde.

Buǵan deıin Ystanbulda qonaq úı týrısterdiń qazasynan keıin jabylǵany habarlanǵan edi.