Ystanbulda esirtkige qarsy operatsııa kezinde tanymal aktrısa Hande Erchel qamaldy
ASTANA. KAZINFORM – Túrkııada esirtkige qarsy operatsııa barysynda tanymal aktrısa Hande Erchel ustaldy, dep habarlaıdy Kazinform agenttiginiń Ankaradaǵy tilshisi.
Ystambulda bir túnde esirtkige qarsy operatsııa barysynda 14 adam tutqyndaldy, olardyń arasynda tanymal aktrısa jáne model Hande Erchel bar. Operatsııany esirtkige qarsy kúres bólimsheleri bir mezgilde 16 jerde júrgizdi.
Túrkııanyń Haberler.com basylymy jarııalaǵan aqparatqa sáıkes, tergeý birneshe aýyr aıyptardy qamtıdy, onyń ishinde esirtkini óndirý jáne taratý, olardyń qoldanylýyn jeńildetý, paıdalaný maqsatynda saqtaý jáne jezókshelik uıymdastyrýǵa qatysý. Ustalǵandardan bólek taǵy eki kúdikti izdestirilip jatyr.
Hande Ercheldiń bul istegi róli týraly resmı málimetter áli ashylmaǵanymen, onyń qamaýǵa alynýy qazirdiń ózinde buqaralyq aqparat quraldary men áleýmettik jelilerde qyzý pikirtalas týdyrdy.
Hande Erchel 1993 jyly 24 qarashada Balykesır provıntsııasynyń Bandyrma qalasynda dúnıege kelgen. Ol akterlik mansabyn 2014 jyly bastady jáne tez arada túrik teledıdaryndaǵy eń tanymal tulǵalardyń birine aınaldy. Akterlik ónermen qatar, Erchel modeldikte de jetistikke jetip, halyqaralyq sulýlyq baıqaýlarynda Túrkııanyń atynan shyqty.
Qazirgi tańda 32 jastaǵy aktrısa túrik teleındýstrııasynda keń tanymaldylyqqa ıe. Onyń qatysýymen túsirilgen jobalar jergilikti telearnalarda turaqty kórsetilip, áleýmettik jelilerde belsendi talqylanady. Ercheldiń jankúıerleriniń sany kóp.
Erchel shetelde, sonyń ishinde Qazaqstanda da tanymal. «Esigimdi qaǵyp» (túrikshe: «Sen Çal Kapımı») serıalynyń sátti shyǵýynyń arqasynda aktrısa qazaqstandyq kórermender arasynda keń aýdıtorııaǵa ıe boldy.
Budan buryn Túrkııada kıberqylmysqa qarsy aýqymdy reıd júrip, 360 kúdikti ustalǵanyn habarlaǵanbyz.
