Ystanbulda belarýs sport sheneýnigi iz-túzsiz joǵalyp ketti

ASTANA. KAZINFORM – Bosfor arqyly ótken qurlyqaralyq júzý kezinde reseılik sportshy Nıkolaı Svechnıkovtyń joǵalýynan keıin, Ystanbulda taǵy bir sheteldik azamat – Belarýs sporttyq yntymaqtastyq qorynyń halyqaralyq bólim basshysy Anatolıı Kotov jumbaq jaǵdaıda iz-túzsiz ketti, dep habarlaıdy agenttiktiń menshikti tilshisi.

Túrik basylymdarynyń málimetinshe, Anatolıı Kotov 21 tamyzda Ystanbulǵa kelgen, alaıda áriptesterine sapary týraly eskertpegen. Ushyp kelgen soń ol tek jubaıyna bir habarlama joldaǵan, sodan beri, bir aptadan astam ýaqyt boıy onyń qaıda ekendigi belgisiz. Qazirgi ýaqytta izdeý sharalary júrgizilýde.

Bul jańalyq Bosfor arqyly ótken halyqaralyq jarys kezinde joǵalyp ketken 29 jastaǵy reseılik júzýshi Nıkolaı Svechnıkovty izdestirý jumystary jalǵasyp jatqan sátte belgili boldy. Bıylǵy jarysqa álemniń túkpir-túkpirinen shamamen úsh myń adam qatysqan. Reseılik sportshy arnaıy osy jarys úshin Túrkııaǵa kelgen, alaıda júzý kezinde joǵalyp ketken. Sodan beri ony súńgýirler, jaǵalaý kúzeti jáne tótenshe jaǵdaı qyzmetkerleri Stambýl gýbernatorlyǵy men Beıkoz prokýratýrasynyń úılestirýimen izdestirip jatyr.

Anatolıı Kotovtyń joǵalýy qosymsha alańdaýshylyq týdyryp otyr. Jergilikti quqyq qorǵaý organdary beınebaqylaý kameralaryn tekserip, sheneýniktiń áýejaıdan qalaǵa deıingi júrip ótken baǵytyn zertteýde.

Túrkııanyń eń iri qalasynda qysqa merzimde eki sheteldiktiń joǵalýy jergilikti bılikti de, halyqaralyq qaýymdastyqty da alańdatyp otyr.

Eske sala keteıik, buǵan deıin reseılik júzýshi Nıkolaı Svechnıkovtyń Bosfordaǵy jarys kezinde joǵalyp ketkeni habarlanǵan bolatyn. Stambuldyń Beıkoz aýdany prokýratýrasy sportshynyń sýǵa batyp ketpeý yqtımaldyǵyn eskere otyryp, arnaıy polıtsııa tobyn quryp, izdestirý sharalaryn kúsheıtken.