Ystanbulda AQSh-Reseı konsýltatsııalary ótip jatyr

ASTANA.KAZINFORM - Ystanbuldaǵy Reseı Bas konsýldyǵynyń ǵımaratynda Reseı men AQSh delegatsııalary arasyndaǵy konsýltatsııalardyń ekinshi raýndy bastaldy, dep habarlaıdy Kazinform tilshisi.

Máskeý men Vashıngton ókilderi arasyndaǵy konsýltatsııalardyń ekinshi raýndy kem degende tórt saǵatqa sozylady dep josparlanǵan. Konsýltatsııalar dıplomatııalyq mıssııalardyń jumysyn qalypqa keltirýge baǵyttalatyny buǵan deıin habarlanǵan.

Reseı delegatsııasyn Reseıdiń AQSh-taǵy elshisi Aleksandr Darchıev, al amerıkalyq delegatsııany AQSh Memlekettik hatshysynyń Eýropa jáne Eýrazııa isteri jónindegi kómekshisiniń orynbasary Sonata Kýlter basqarady. Delegatsııalardyń qalǵan músheleri – eki eldiń syrtqy ister organdarynyń qyzmetkerleri.

Sonymen qatar, Túrkııa prezıdentiniń ákimshiligi Ankaranyń bul kelissózder úderisine aralaspaıtynyn atap ótti.

Aıta keteıik, buǵan deıingi konsýltatsııalar da Ystanbulda 27 aqpanda AQSh bas konsýlynyń rezıdentsııasynda ótip, 6 saǵattan astam ýaqytqa sozyldy.