Ystanbul jospary aıasyndaǵy jumystar komıssııa otyrysynda talqylandy

ASTANA.KAZINFORM — Memlekettik keńesshi Erlan Qarınniń tóraǵalyǵymen Sybaılas jemqorlyqqa qarsy is-qımyl máseleleri jónindegi komıssııanyń otyrysy ótti. Bul týraly Aqordanyń baspasóz qyzmeti habarlady.

 

Memlekettik keńesshi Erlan Qarınniń tóraǵalyǵymen Qazaqstan Respýblıkasy Prezıdenti janyndaǵy sybaılas jemqorlyqqa qarsy is-qımyl máseleleri jónindegi komıssııanyń kezekti otyrysy ótti.

Jıynda Ekonomıkalyq yntymaqtastyq jáne damý uıymynyń sybaılas jemqorlyqqa qarsy kúres jónindegi Ystanbul josparyna sáıkes monıtorıng júrgizýdiń 5-shi raýndy aıasynda atqarylǵan jumystar talqylandy.

Otyrysta Memlekettik qyzmet isteri agenttiginiń tóraǵasy Darhan Jazyqbaı, Bas prokýror Berik Asylov, Qarjy mınıstri Mádı Tákıev, Ádilet mınıstri Erlan Sársembaev baıandama jasady.

Ýákiletti organdardyń ókilderi halyqaralyq ozyq tájirıbelerdi engizý arqyly elimizdiń quqyq qoldaný tájirıbesin jetildirý baǵytynda qabyldanyp jatqan sharalar týraly baıandady.

Qazirgi tańda sybaılas jemqorlyqqa qarsy ulttyq zańnamany jetildirýge baǵyttalǵan zań jobasy Parlament Májilisiniń qaraýyna engizildi.

Jıyn sońynda Erlan Qarın sybaılas jemqorlyqqa qarsy kúres jónindegi Ystanbul jospary aıasyndaǵy usynymdardy jan-jaqty pysyqtaý mańyzdy ekenin atap ótti. 

Aıta ketelik BQO-da qaramaǵyndaǵylar sybaılas jemqorlyqqa barǵan 13 sheneýnik jaýapqa tartylǵan edi.