Ystanbul – Shymkent reısiniń jolaýshysynan 25 dana dinı ádebıet tárkilendi
ASTANA. KAZINFORM – Shymkent halyqaralyq áýejaıynda dinı mazmundaǵy materıaldardy zańsyz alyp ótý áreketiniń joly kesildi, dep habarlaıdy Kazinform agenttiginiń tilshisi.
Kólik polıtseıleri Ystanbul – Shymkent baǵytyndaǵy áýe reısiniń jolaýshylaryn tekserý kezinde Túrkistan oblysynyń 47 jastaǵy turǵynynan 25 dana dinı ádebıet tapqan.
– Atalǵan azamat Qazaqstan Respýblıkasynyń zańnamasynda belgilengen talaptardy buza otyryp, dinı ádebıetter men dinı mazmundaǵy ózge de materıaldardy el aýmaǵyna alyp kirgeni úshin ákimshilik jaýapkershilikke tartyldy, – dedi Kóliktegi polıtsııa departamenti bastyǵynyń birinshi orynbasary Temirjan Ramazanov.
Polıtsııanyń málimetinshe, «Dinı qyzmet jáne dinı birlestikter týraly» Qazaqstan Respýblıkasynyń Zańyna sáıkes, dinı ádebıetter men ózge de dinı mazmundaǵy materıaldardy el aýmaǵyna tek memlekettik tirkeýden ótken dinı birlestikter ǵana dintaný saraptamasynyń oń qorytyndysy bolǵan jaǵdaıda ákele alady.
Al jeke paıdalanýǵa arnalǵan materıaldardy ár ataýy boıynsha bir danadan ǵana alyp ótýge ruqsat etiledi.
Buǵan deıin Baıqońyr qalasy turǵyndarynyń úılerinen 180-ge jýyq dinı ádebıet tabylǵan bolatyn. Atalǵan fakti boıynsha dinı qyzmet jáne dinı birlestikter týraly zańnamany buzý deregimen ákimshilik hattamalar toltyrylǵan.
