Ystanbul klımattyq qaýipterge qarsy sharalardy kúsheıtpek

ASTANA. KAZINFORM —   Ystambul tabıǵı apattardan qorǵanýdy kúsheıtpek. Dúnıejúzilik bank ınfraqurylymdy jańǵyrtý úshin 650 mıllıon dollar bóldi, dep habarlaıdy Kazinform agenttiginiń menshikti tilshisi.

Dúnıejúzilik bank Ystambuldyń tabıǵı apattar men klımattyq qaýipterge tózimdiligin arttyrýǵa baǵyttalǵan aýqymdy Istanbul Resilience Project jobasyn júzege asyrý úshin 650 mıllıon dollar kóleminde nesıe berýdi maquldady. Bank ókilderiniń aıtýynsha, bul – Túrkııanyń eń iri qalasynda adamdardy, ekonomıkalyq qyzmetti jáne ómirdi qorǵaýǵa baǵyttalǵan mańyzdy ınvestıtsııa.

Joba aıasynda qalalyq ınfraqurylymdy keshendi jańǵyrtý kózdelgen. Atap aıtqanda, 250 jańa jedel járdem stantsııasy, eki izdestirý-qutqarý ortalyǵy, 19 órt sóndirý stantsııasy jáne órtti erte anyqtaý munaralary salynatyn bolady. Budan bólek, 50 qoǵamdyq ǵımarat – mektepter, áleýmettik ortalyqtar men qarttar úıleri – seısmıkalyq tózimdilik pen klımattyq turaqtylyq talaptaryna saı beıimdelmek.

Qurylys sharalarynan bólek, joba tótenshe jaǵdaılarǵa qalanyń daıyndyq deńgeıin arttyrýǵa baǵyttalǵan is-sharalardy da qamtıdy. Logıstıkalyq qoldaý, qyzmetkerlerdi oqytý, tehnıkalyq kómek kórsetý, sondaı-aq tótenshe jaǵdaılar kezinde qarjyny jedel qaıta bólý tetigi engiziledi.

Istanbul Resilience Project megapolıs turǵyndarynyń qaýipsizdigin qamtamasyz etý jolyndaǵy mańyzdy qadam bolmaq jáne qalanyń klımattyq ári tabıǵı qaýipterge qarsy turý qabiletin kúsheıtedi.

Buǵan deıin Túrkııanyń ırrıgatsııa júıesin jańǵyrtý úshin Dúnıejúzilik bankten 1 mıllıard eýrodan astam qarajat alǵany habarlanǵan bolatyn.

Túrkııa belsendi túrde ǵylymǵa qarjy quıa bastady.