Ystanbul áýejaıynda jańa ushý-qoný jolaǵy ashylady
ASTANA. KAZINFORM — Jańa ushý-qoný jolaǵy áýejaıdyń ótkizý múmkindigin keńeıtip, ishki jáne shyǵys baǵyttardaǵy reısterdi tıimdi uıymdastyrýǵa múmkindik beredi, dep habarlaıdy Kazinform agenttiginiń Ankaradaǵy menshikti tilshisi.
Ystanbul áýejaıynyń tórtinshi negizgi ushý-qoný jolaǵy 18 qyrkúıekte paıdalanýǵa beriledi. Ashylý rásimine Túrkııa Prezıdenti Rejep Taııp Erdoǵan qatysady dep kútiledi. Bul týraly Kólik jáne ınfraqurylym mınıstri Abdýlkadır Ýraloglý málimdedi.
Mınıstrdiń aıtýynsha, jańa jolaq iske qosylǵannan keıin áýejaıdaǵy ushý-qoný jolaqtarynyń sany altyǵa jetedi: tórteýi negizgi, ekeýi rezervtik bolady. Qazir áýejaıda úsh negizgi jáne eki rezervtik jolaq bar.
Áýejaıdaǵy jańa ushý-qoný jolaǵy shyǵystan batysqa baǵyttalǵan alǵashqy jolaq bolmaq. Onyń uzyndyǵy 2 820 metr, eni 45 metr.
A.Ýraloglýdyń aıtýynsha, jańa ınfraqurylym ishki jáne shyǵys baǵyttaǵy reısterge qyzmet kórsetýdi jedeldetedi. Ushaqtardyń áýejaıdaǵy qozǵalysy men ushý ýaqyty qysqaryp, áýe kompanııalary janarmaı men ýaqytty únemdeıdi.
Budan bólek ushý-qoný jolaǵynyń shyǵys-batys baǵyty ártúrli aýa raıy jaǵdaıynda áýe qozǵalysyn tıimdi uıymdastyrýǵa múmkindik beredi. Bılik ushý men qoný kezindegi qaýipsizdik deńgeıin arttyryp, reısterdiń ýaqytyly oryndalý kórsetkishin jaqsartýdy kózdep otyr.
Mınıstr Ystanbul áýejaıy búginde 110-nan astam áýe kompanııasymen birlesip, 340-tan astam baǵytqa ushatyn reısterge qyzmet kórsetip otyrǵanyn atap ótti. Buǵan deıin áýejaı Eýropada úsh táýelsiz negizgi ushý-qoný jolaǵyn bir mezgilde paıdalanǵan alǵashqy áýejaı atanǵan.
Túrik bıligi tórtinshi negizgi ushý-qoný jolaǵynyń iske qosylýyn Ystanbul áýejaıynyń ınfraqurylymyn odan ári damytýdyń kezekti kezeńi dep baǵalaıdy.
Buǵan deıin Ystanbul áýejaıy jolaýshy tasymaly boıynsha rekord ornatqanyn habarlaǵan bolatynbyz.
Aqzat Jıenalına
