Ystanbul AQSh-tyń qatysýymen Reseı men Ýkraına arasyndaǵy sheshýshi kelissózge daıyndalyp jatyr

ASTANA. KAZINFORM – 15 mamyr Reseı-Ýkraına qaqtyǵysy tarıhyndaǵy betburys kezeńi bolýy múmkin. Túrkııa Reseı, Ýkraına jáne AQSh basshylarynyń qatysýy múmkin aýqymdy kelissóz alańyn daıyndap jatyr, dep habarlaıdy Kazinform menshikti tilshisi. 

Halyqaralyq aqparat agenttikteriniń habarlaýynsha, AQSh prezıdenti Donald Tramptyń eki arnaıy ókili Stıv Ýıtkoff pen general Kıt Kellog aldaǵy kúnderi Ystanbulǵa barady. Sonymen qatar, Tramptyń ózi Memlekettik hatshy Marko Rýbıonyń qatysatynyn málimdedi.

AQSh prezıdentiniń aıtýynsha, «Túrkııada jaqsy nátıje bolýy múmkin jáne Rýbıo sonda barady».

Ýkraına prezıdenti Vladımır Zelenskıı Túrkııada Vladımır Pýtınmen jeke kezdesýge daıyn ekenin rastady. Baspasóz máslıhatyndaǵy málimdemesinde ol Túrkııa prezıdenti Rejep Taııp Erdoǵanmen kelissóz 15 mamyr, beısenbi kúni Ankarada josparlanǵanyn habarlady. Zelenskıı Pýtınniń jeke kezdesýge kelisedi dep kútetinin jáne oǵan Donald Tramptyń da qatysatynyna senim bildirdi. 

- Bul kúshti saıası sıgnal bolar edi. Biz Erdoǵanmen birge Pýtın úshin qosymsha yntalandyrý retinde Tramptyń qatysýyn usyndyq, - dep atap ótti Ýkraına basshysy.

Bul rette Kremldiń baspasóz hatshysy Dmıtrıı Peskov reseılik delegatsııanyń quramyn jarııa etýden bas tartyp, Pýtın ony qajet dep tapqan kezde ózi jarııalaıtynyn basa aıtty. Osy arada amerıkalyq derekkózder AQSh beısenbi kúni tańerteńge deıin reseılik delegatsııa týraly resmı aqparatty kútpeıtinin habarlady. 

Túrli sarapshylardyń pikirinshe, Ystanbulda kelissóz júrgizý bastamasy Reseı prezıdentine tıesili. Alaıda Vladımır Pýtın kelissózge jeke qatysa ma, álde óz delegattaryn jibere me, ol belgisiz. Bul rette Zelenskıı tómengi deńgeıdegi sheneýniktermen kezdesýge nıeti joq ekenin málimdedi.

Pýtın men Zelenskııdiń kezdesýi ótetin bolsa, bul tolyq aýqymdy qaqtyǵys bastalǵannan beri eki el kóshbasshylarynyń alǵashqy jeke dıalogy bolmaq. AQSh-tyń joǵary laýazymdy sheneýnikteriniń qatysýy, ásirese, geosaıası turaqsyzdyqty eskere otyryp, kelissózge jańa serpin berýi múmkin. 

Álem kútip otyr. Birqatar eldiń bolashaǵy Bosfor jaǵasyndaǵy qonaqúıdiń zaldarynda sheshile me, ol aldaǵy kúnderi belgili bolady. 

Buǵan deıin Túrkııa Reseı men Ýkraına arasyndaǵy kelissózderdi uıymdastyrýǵa daıyn ekenin málimdedi.