Ystanbuldaǵy jer silkinisi: 151 adam zardap shekti

ASTANA. KAZINFORM — Sársenbi, 23 sáýirde Ystanbulda birneshe jer silkinisi boldy. Olardyń eń kúshtisi magnıtýdasy 6,2-ge jetti, dep habarlady Túrkııa ishki ister mınıstri Alı Ierlıkaıa. Bıliktiń málimetinshe, kúndizgi jer asty dúmpýleri saldarynan 151 adam zardap shekken, qaza tapqandar joq, dep jazady DW.

Jer silkinisiniń oshaǵy Mármár teńizinde, shamamen 7 shaqyrym tereńdikte, túrik megapolısinen shamamen 60 shaqyrym jerde ornalasqan, dep habarlaıdy dpa agenttigi. Bul sońǵy 25 jyldaǵy aımaqtaǵy eń kúshti jer silkinisi boldy.

— Birneshe saǵat ishinde 127 aftershok tirkelgen, olardyń eń kúshtisi magnıtýdasy 5,9 boldy, — dedi Túrkııanyń ishki ister mınıstri.

Áli alda kúshti jer silkinisi bolady degen boljam bar. Eldegi geofızıkalyq zertteý ortalyǵy jaqyn arada aımaqta kúshti jer silkinisi bolýy múmkin ekenin aıtyp, dabyl qaǵyp otyr.

15 mıllıonnan astam halqy bar túrik megapolısi jer silkinisine daıyn emes, óıtkeni qala tyǵyz salynǵan jáne qala ishinde ashyq keńistikter qol jetimdi emes, dep jazady dpa.

Ystanbuldyń kóptegen turǵyny jer silkinisi týraly SMS habarlama almaǵan, degenmen mundaı júıe bar, dep jazady dpa.

Aıta keteıik, Ystanbulda júrgen Abaı esimdi otandasymyz jer silkinisi qorqynyshty bolǵanyn aıtqan edi.