Iisshil ıtterdiń qamqorshysy kim
ATYRAÝ. KAZINFORM — Atyraý oblysy polıtsııa departamentiniń kınologııalyq qyzmet ortalyǵynda 17 qyzmettik-izdestirý ıti bar. Olardyń qatarynda belgııalyq, nemis jáne shyǵys eýropalyq ovcharkalar, sondaı-aq labrador men spanıel tuqymdary kezdesedi.
Ár ıttiń óz baǵyty men mamandanýy bar. Mysaly, biri jarylǵysh zattardy anyqtaýǵa úıretilse, endi biri iz kesý, joǵalǵan adamdardy tabý nemese qoǵamdyq tártipti saqtaý sharalaryna qatysady. Iisshil ıtter polıtseılermen bir sapta jumys istep, arnaıy operatsııalar men qaýipti jaǵdaılarda aldyńǵy shepte júredi.
Osyndaı jaýapty qyzmetti atqaratyn ıtterdiń densaýlyǵy men qyzmetke daıyndyǵy — ortalyqtaǵy mańyzdy mindetterdiń biri. Bul istiń basy qasynda veterınarlyq feldsher Tatıana Demıasheva júredi.
Tatıana Demıasheva ishki ister organdarynda 2001 jyldan beri eńbek etip keledi. Volgograd aýyl sharýashylyǵy akademııasynda joǵary bilim alǵan maman bul salaǵa birden kelmegen. Ártúrli baǵytty baıqap kórip, janýarlarǵa kómektesý — onyń júrek qalaýy ekenin túsinedi. Alǵashynda jeke veterınarlyq tájirıbemen aınalysyp, mal dárigeri bolyp jumys istegen. Keıin kınologııalyq qyzmettiń burynǵy basshysynyń shaqyrýymen polıtsııa departamentiniń kınologııalyq ortalyǵyna qyzmetke ornalasady.
Búginde onyń kúndelikti jumysy naqty tártipke negizdelgen. Qyzmettik ıtterdiń jalpy jaǵdaıyn baqylaý, dene qyzýyn ólsheý, tábeti men minez-qulqyna nazar aýdarý, profılaktıkalyq sharalar júrgizý — bári veterınarlyq baqylaýda. Vaktsınatsııa, parazıtterge qarsy óńdeý, dárýmender men mıneraldyq qospalar berý, jýyndyrý jumystary arnaıy qujattarda tirkeledi.
— Olar sóıleı almaıdy, biraq bárin sezedi. Qımylynan, kózqarasynan-aq mazasyzdyqty ańǵarýǵa bolady. Biz bir-birimizdi sózsiz túsinemiz, — deıdi Tatıana Demıasheva.
Kınologııalyq qyzmette jumys ýaqyty naqty kestemen shektelmeıdi. Pandemııa kezinde polıtsııa qyzmetkerleri qyzmettik ıtterimen birge blokbeketterde táýlik boıy kezekshilik atqarǵan. Sol ýaqytta veterınarlyq feldsher barlyq beketti aralap, ıtterdiń jaǵdaıyn baqylap, aýa raıynyń qolaısyz kezinde olardyń qaýipsizdigi men jaılylyǵyn qamtamasyz etýge atsalysqan.
Mamannyń aıtýynsha, eń kúrdeli kezeń — jas ıtterdiń ortalyqqa beıimdelýi jáne qyzmettik ıtterdi zeınetke shyǵaryp salý sáti. Ádette olar 7-8 jasqa kelgende esepten shyǵarylady. Qaýip-qatermen qatar júretin bul qyzmette ár kezekshilik úlken jaýapkershilik júkteıdi.
— Ár saparǵa shyqqanda alańdaısyń. Sebebi olar birinshi bolyp qaýipti aımaqqa kiredi. Itter — kınologııalyq ortalyqtyń eń basty qyzmetkerleri, — deıdi keıipkerimiz Tatıana Demıasheva.
Aıta keteıik, byltyr Atyraý oblysynda qyzmettik ıtterdiń qatysýymen 120 qylmystyq quqyq buzýshylyq ashyldy.
Osyǵan deıin Abaı oblysynda qyzmettik ıtterdiń kómegimen 28 qylmys ashylǵany týraly habarlaǵan edik.