Ispanııanyń qaı qalasynda bilim alatyn qazaqstandyqtar kóp
NUR-SULTAN. QazAqparat - Qazaqstandyq jastar tarapynan Ispanııada bilim alýǵa degen suranys joǵary. Eýropanyń irgeli eliniń bilimi jaıly SІM-de ótken baspasóz máslıhatynda Qazaqstannyń Ispanııadaǵy jáne Andorradaǵy elshisi qyzmetin qosa atqarýshy Konstantın Jıgalov keńirek sóz qozǵady, dep habarlaıdy QazAqparat tilshisi.
«Ispanııaǵa degen qyzyǵýshylyq bizdiń elde joǵary. Alaıda kóptegen JOO-larda oqýdyń ıspan tilinde júrgizilýi edáýir kedergi keltirip turǵanyn atap ótý kerek. Jýyrda ǵana men Kadıs qalasyndaǵy ýnıversıtette boldym. Kadıs degen Ispanııanyń shaǵynda bolsa ejelgi shaharlarynyń biri. Sol jerde bizdiń eldiń stýdentterimen kezdestim. Sóıtsem, Kadıs qalasyndaǵy ýnıversıtette Qazaqstannyń 8 stýdenti oqıdy eken. Sońǵy on jylda 140 bala Kadıstegi bir ǵana ýnıversıtette bilim alypty. Álbette, kópshilik Barselona men Madrıdke qyzyǵady. Stýdentterdiń basym shoǵyry iri qalalarda bilim alyp jatyr», - deıdi elshi.
Dıplomat sonymen qatar Ispanııada qazaqstandyqtar fýtboldyń qyr-syryn qalaı meńgerip jatqanyn da aıtyp berdi.
«Bizdiń eldiń jastary qazirgi ýaqytta Brazılııada, Túrkııada, Ispanııada fýtbol bilimin meńgerý ústinde. Bizde belgili bir dárejede «Barselona» klýbymen baılanys ta ornap qalǵan (...) Búgingi kúni Kanar araldarynda bir adamdy qurmetti konsýl retinde bekitip qoıýdy oılastyryp otyrmyz. Ol kezinde «Barselona» sapynda dop tepken. Bizdiń jastarymyz Ispanııada fýtboldy meńgere alatyndaı jaǵdaı jasaý úshin sol kisige usynys jasamaq oıymyz bar», - deıdi ol.
Eske sala ketsek osy brıfıngte Konstantın Jıgalov Qazaqstannan Ispanııaǵa jylyna qansha týrıst baratynyn aıtyp bergen bolatyn.
