Ispanııanyń tanymal jýrnaly Almatyny taý bókterindegi úzdik 5 qalanyń qataryna qosty
ALMATY. KAZINFORM — Ispanııanyń Viajar týrıstik jýrnaly Almatyny taý bókterinde ornalasqan jáne qala ortalyǵynan taý shańǵysy trassalaryna jyldam jetýge bolatyn álemdegi bes qalanyń qataryna engizdi.
Basylymdaǵy maqalada Almaty qysqy ári belsendi týrızmge arnalǵan ınfraqurylymy damyǵan Insbrýk (Avstrııa), Grenobl (Frantsııa) jáne Zaltsbýrg (Avstrııa) syndy tanymal baǵyttarmen qatar usynylǵan.
Almaty ákimdiginiń málimetinshe, materıal Viajar jýrnaly ókilderiniń Almatyǵa jasaǵan saparynyń nátıjesinde ázirlengen. Atalǵan sapar Almaty Tourism Bureau qoldaýymen uıymdastyrylyp, qonaqtarǵa qalanyń basty týrıstik nysandary, tabıǵı kelbeti men mádenı kórikti jerleri kórsetilgen.
— Ásirese, Shymbulaq taý shańǵysy kýrortyna erekshe nazar aýdarylǵan. Mundaǵy aspaly jol qonaqtardy teńiz deńgeıinen 3 myń metrden astam bıiktikke kóterse, álemdegi eń bıik taýly ashyq muz aıdyny ornalasqan Medeý kesheni de tamsandyrdy. Aspaly jolmen joǵary kóterilý umytylmas áser syılasa, qalanyń baı mádenı jáne gastronomııalyq ómiri Almatyny saıahatshylar úshin burynǵydan da tartymdy ete túsedi, — dep habarlady ákimdikten.
Eske salaıyq, 1978 jyly qurylǵan Viajar jýrnaly Ispanııadaǵy eń bedeldi týrıstik basylymdardyń biri sanalady. Saıahatshylarǵa arnalǵan basylym mádenı, belsendi ári tanymdyq týrızmge basymdyq beredi.
Eske salaıyq, buǵan deıin Vogue Qazaqstandy 2025 jylǵy eń úzdik 14 baǵytqa qosty.
