Ispanııanyń ońtústiginde hımııalyq qoımadan shyqqan órtten 80 myń adam oqshaýlandy

ASTANA.KAZINFORM - Sevılıada hımııalyq qoımadaǵy jarylystan keıin ýly zattardyń aýaǵa taralýyna baılanysty 80 myń turǵyn oqshaýlandy. Birinshi deńgeıli tótenshe jaǵdaı rejımi jarııalandy, dep habarlaıdy Euronews.

Ispanııanyń ońtústigindegi Sevılıa mańyndaǵy Alkala-de-Gýadaıra qalasynyń ónerkásiptik aýdanyndaǵy hımııalyq qoımada iri órt shyqty. Ýlaný qaýpine baılanysty myńdaǵan adamǵa úıden shyqpaýǵa buıryq berildi.

Órt aldynda jarylys bolǵan, onyń neden shyqqany ázirge belgisiz. Kompanııa qyzmetkerleri tótenshe jaǵdaı oryn alǵan jerden shyǵyp úlgerdi. Biraq bir adamdy kúıik shalyp, aýrýhanaǵa tústi.

Qala ústin qara tútin basty. Ol órt ornynan 80 shaqyrymnan astam jerdegi mýnıtsıpalıtetterden kórinedi.

Qoımaǵa jaqyn ornalasqan birneshe úıdiń turǵyndary evakýatsııalandy.

Andalýsııa bıligi birinshi deńgeıli tótenshe jaǵdaı jarııalady. Olar bul oqıǵany órttiń aýqymy men janyp jatqan materıaldyń ýlylyǵyna baılanysty «dabyl» dep sıpattady. Órtti sóndirýge jaqyn mańdaǵy qalalardan órt sóndirý brıgadalary jumyldyryldy.

Qaýipti aımaqta 80 myńǵa jýyq adam turady. «Es-Alert» mobıldi qyzmeti arqyly turǵyndarǵa úı-jaılardan shyqpaý, ishke tútin kirmeý úshin terezeler men esikterdi jabý, respıratorlyq maska kııý týraly eskertý jiberildi.

11 myń sharshy metrdi quraıtyn nysan «Plaınsýr» kompanııasyna tıesili. Ol kúkirt, fosfor, sondaı-aq maılar men eritkishter, hımııalyq ónimder satýmen aınalysady.

Buǵan deıin jazǵanymyzdaı, Ispanııa elektr qýatynyń sónýinen €1 mlrd shyǵyn kórýi yqtımal.