Ispanııanyń Lerıda qalasynda býrka men nıkab kııýge tyıym salyndy
ASTANA. KAZINFORM — Ispanııanyń shyǵysyndaǵy Katalonııa óńirinde ornalasqan Lerıda qalasynda qoǵamdyq oryndarda áıelderdiń bet-júzin tolyq jaýyp turatyn nıkab pen býrka kııýine tyıym salyndy, dep habarlaıdy Anadoly.
Lerıda qalalyq keńesi «Azamattardyń tártibi jáne birge ómir súrý týraly» qaýly qabyldap, býrka nemese nıkab sııaqty betti tolyq jaýyp turatyn kıimderdi kııýge tyıym saldy.
Lerıda ákimshiligin Katalonııa sotsıalıstik partııasy (PSC) men «Katalonııa úshin birlik» (Junts) partııasy quraıdy. Qaýlyǵa sáıkes, býrka men nıkab kııýge qoıylǵan talapty buzǵandarǵa 400-den 750 eýroǵa deıin aıyppul salynady.
Tyıymnan dinı ǵıbadat oryndary jáne býrka men nıkab kııýge ruqsat etilgen basqa da nysandar alyp tastaldy.
Lerıda meri Felıks Larrosa bul sheshim qaladaǵy musylman qaýymdastyǵy ókilderimen konsýltatsııalar ótkizilgennen keıin qabyldanǵanyn aıtty. Qala halqynyń shamamen 9%-yn musylmandar quraıdy.
Býrka men nıkab kııýge tyıym salý máselesi Italııa premer-mınıstri Djordja Melonıdiń málimdemelerinen keıin Eýropada qaıtadan kún tártibine shyqty.
Búgin Italııa úkimeti de mektepterde býrka men nıkab sııaqty betti jaýyp turatyn kıimderdi kııýge tyıym salatyn qaýlyny maquldady.
Osyǵan deıin Atyraýda er adam nıkab kıgen boıjetkendi aıaýsyz urǵanyn jazǵan edik.
