Ispanııanyń burynǵy premer-mınıstri Sapateronyń keńsesinde tintý júrgizildi
ASTANA. KAZINFORM — Ispanııa polıtsııasy eldiń burynǵy premer-mınıstri Hose Lýıs Rodrıges Sapateronyń keńsesinde Plus Ultra áýe kompanııasyna qatysty is boıynsha tintý júrgizdi.
Tergeý barysynda zergerlik buıymdar, saǵattar, qatty dıskiler men qujattar tárkilendi, dep habarlaıdy Kazinform agenttigi Euronews-ke silteme jasap.
Tintý Ispanııanyń Ulttyq sotynyń sheshimimen júrgizilgen.
Operatsııaǵa Ekonomıkalyq jáne salyq qylmystaryna qarsy kúres basqarmasynyń qyzmetkerleri men seıfter men jasyryn oryndardy ashýǵa mamandanǵan tehnıkalyq aralasý tobynyń ókilderi qatysqan.
Seıf ishinen saqınalar, syrǵalar, bilezikter, alqalar jáne birneshe saǵat tabylǵan.
Olardyń bir bóliginde arnaıy jazýlar qashalǵan.
Quqyq qorǵaý organdary sondaı-aq qatty dıskilerdi, qujattardy, kompanııalar men kelisimsharttarǵa qatysty papkalardy jáne 2019–2025 jyldarǵa arnalǵan kúndelikterdi tárkilegen.
Sapateronyń hatshysy tergeýshilerge zergerlik buıymdardyń bir bóligi burynǵy premerdiń jubaıyna tıesili ekenin aıtqan.
Onyń sózinshe, bul áshekeıler mura retinde qalǵan.
Tergeý organdary Hose Lýıs Rodrıges Sapateronyń COVID-19 pandemııasy kezinde Plus Ultra áýe kompanııasyna bólingen memlekettik qarjylaı kómekke baılanysty yqpal saýdasy shemasyna qatysy bolýy múmkin degen nusqany tekserip jatyr.
Áńgime 53 mıllıon eýro kólemindegi qoldaý týraly bolyp otyr.
Tergeý boljamynsha, zerttelip jatqan korporatıvtik qurylym burynǵy premer-mınıstrdiń aınalasyndaǵy adamdarmen baılanysty bolýy múmkin.
Sapatero ózine taǵylǵan aıyptardy joqqa shyǵardy.
Ol bul jaǵdaıdy «qýdalaý» dep atady.
Onyń aıtýynsha, otbasy jaldamaly úıge kóshkennen keıin baǵaly zattardy jumys kabınetindegi seıfke qoıǵan.
Ispanııanyń burynǵy premer-mınıstri 2 maýsym kúni sotta jaýap beredi.
Buǵan deıin Ispanııa polıtsııasy Europol jáne Italııa quqyq qorǵaý organdarymen birlesip týrısterdiń qymbat saǵattaryn urlaýmen aınalysqan qylmystyq topqa qarsy operatsııa júrgizgeni habarlanǵan edi.
