Ispanııalyq tennısshi Nadal Rolan Garros týrnırin 13 márte utty

R.Nadal fınalda álemniń 1-raketkasy, serbııalyq Novak Djokovıchpen bas júldeni sarapqa saldy.

Ispanııalyq tennısshi buǵan deıin «Úlken dýlyǵa» týrnırin 19, sonyń ishinde «Rolan Garros» jarysyn 12 márte utqan bolatyn. Sarapshylardyń ony topyraq tósenishinde ótetin dodalardyń koroli, tennıs tarıhyndaǵy úzdik oıynshy dep sanaýy tegin emes.

N.Djokovıch «Úlken dýlyǵa» jarystarynda 17 ret top jardy. Degenmen ol Frantsııa ashyq chempıonatynda bir-aq ret jeńimpaz atandy.

Osyǵan deıin qarsylastar 55 márte ózara kezdesse, sonyń 29-ynda 33 jastaǵy Novak jeńiske jetti. Odan bir jasqa úlken Nadal 26 jeńisiniń kópshiligin topyraq tósenishinde qol jetkizdi. Jalpy, bul básekeni alyptar shaıqasy deýge bolady.

Birinshi partııada ıspanııalyq tennısshi serbııalyqtyń birde-bir geım alýyna múmkindik bergen joq – 6:0. Mundaı esep myqtylar arasynda óte sırek kezdesedi.

Ekinshi sette de R.Nadal aıqyn basymdylyq tanytty – 6:2.

Úshinshi partııada esep 2:2 bolǵan mezette Nadal breık jasaǵanymen, Djokovıch sol boıda qarymta qaıyrdy – 3:3. Bul Novaktyń matchtaǵy alǵashqy breıgi edi. Esep 5:5 bolǵanda, Nadal qarsylasy qatelesip, jetinshi breıgine qol jetkizdi – 6:5. Sodan keıin matchty eıspen túıindedi – 7:5.

Fınaldyq jekpe-jek 2 saǵat 42 mınýtqa sozyldy.

Osylaısha R.Nadal Rolan Garros týrnıriniń 13 dúrkin chempıony atanyp, «Úlken dýlyǵa» jarystaryndaǵy jeńisi (20) jóninen shveıtsarııalyq Rodjer Federermen teńesti.

Qazaqstandyqtar Aleksandr Býblık pen Mıhaıl Kýkýshkın Frantsııa ashyq chempıonatynda ekinshi aınalymnan asa almady. Endi olar 12 qazan kúni bastalatyn Sankt-Peterbýrg ATR 500 týrnırinde baq synaıdy. A.Býblık bastapqy kezdesýin amerıkalyq Makkenzı Makdonaldpen, M.Kýkýshkın serbııalyq Mıomır Ketsmanovıchpen ótkizedi.

Eske sala keteıik, budan buryn A.Býblık pen M.Kýkýshkınniń Sankt-Peterbýrg týrnırindegi qarsylastary anyqtalǵanyn jazǵan bolatynbyz.