Ispanııalyq tennısshi AQSh ashyq chempıonatynyń chempıony atandy
NUR-SULTAN. QazAqparat - Ispanııalyq, 19 jastaǵy Karlos Alkaras alǵash ret AQSh ashyq chempıonatynyń jeńimpazy atandy, dep habarlaıdy QazAqparat tilshisi.
Ispanııalyq tennısshi osyǵan deıin álemdik reıtıngide tórtinshi orynda tursa, onyń fınaldaǵy qarsylasy, 23 jastaǵy norvegııalyq Kasper Rýýd 7-satyda edi.
Bul olardyń «Úlken dýlyǵa» týrnırindegi alǵashqy fınaly edi.
Dúnıejúzilik reıtıngte kósh bastaǵan, US Open jarysynyń ótken jylǵy jeńimpazy, reseılik Danııl Medvedev shırek fınalda aýstralııalyq Nık Kırostan utylyp qalǵannan keıin K.Alkaras pen K.Rýýdtyń qaı jeńgeni álemniń birinshi raketkasy atanatyn edi.
Buǵan deıin qarsylastar eki ret kezdesip, ıspanııalyq sportshy basym túsken bolatyn.
AQSh ashyq chempıonatynyń fınalynda da K.Alkaras oıyn tizginin ýysynan shyǵarǵan joq - 6:4, 2:6, 7:6 (7:1), 6:3.
Úsh saǵat 23 mınýtqa sozylǵan kezdesýde Alkaras 14 eıs jasap, 11 breık-poınttyń úsheýin paıdalana bildi. Rýýd 4 eıs, 3 breıkpen (10 breık-poınt) kózge tústi.
Osylaısha, Karlos Alkaras tennıs tarıhynda álemdik reıtıngide kósh bastaǵan eń jas sportshy atanady. Ol 2,6 mln AQSh dollary kóleminde tabys taýyp, 2 myń reıtıngilik upaıǵa ıe boldy.
Ekinshi raketka atanatyn Kasper Rýýd 1,3 mln dollarǵa qosa 1300 upaıǵa qol jetkizdi.
Qazaqstandyq tennısshiler AQSh ashyq chempıonatynda sátti óner kórsete alǵan joq.
Eske sala keteıik, budan buryn Aleksandr Býblıktiń ulttyq qurama úshin baryn salatyny týraly aıtqanyn jazǵan bolatynbyz.
Foto: ELSA/Getty images via afp
