Ispanııalyq oqýshy atasy jınaǵan 10 myń eýrony synyptastaryna taratyp berdi
ASTANA. QazAqparat - Ispanııanyń Barselona provıntsııasynyń Kaldes-Monbýı qalasynda turatyn 10 jasar bala atasynyń 100 eýrolyq banknottarmen jınap júrgen bir býma qarjysyn taýyp alǵan. Ol qarjyny mektepke alyp baryp, 10 myń eýrodan synyptastaryna taratyp bergen, dep jazady newsru.com.
Bul týraly ustazdardyń biriniń balalardyń óte iri kólemdegi aqsha ustap júrgenin kórgen soń belgili bolǵan. Ádette munshama kólemdegi iri aqshany mektep oqýshylary ustap júrmeıtin, dep jazady The Local.
Oqıǵa Escola Montbui bastaýysh mektebinde boldy.
Bolǵan jaǵdaı týraly WhatsApp jelisindegi ata-analar tobyna habarlanǵan, sondaı-aq Onda Cero radıostansasy arqyly da jarııalanǵan.
Mektep oqýshylaryna aqshany qaıtarý jóninde usynys jasaldy.
«Búgin tańerteń 5-shi synyp oqýshysy úıinen alyp kelgen 100 eýrolyq banknottardy balalarǵa taratyp berdi. Eger sizderdiń balalaryńyzdyń qolyna osy qarjynyń qandaı da bir bóligi tıgen bolsa, mindetti túrde mektepke habarlasyp, qajetti somany ıesine qaıtarýlaryńyzdy suraımyz. Jalpy barlyǵy 10 myńnan astam eýrony qaıtarý kerek. Biz sizder jaǵdaıdy túsinip, qoldaý kórsetedi degen senimdemiz»,-delingen habarlamada.
Katalonııalyq El Punt Avui basylymy máseleniń polıtsııanyń aralasýynsyz sheshilgendigin jazady. Sebebi aqsha ıeleri polıtsııaǵa shaǵym túsirmegen.
Europa Press-tegi derekkózder másele sheshimin taýyp, aqsha ıesine qaıtarylǵandyǵyn jazady. Basylym málimetterinshe, oqýshynyń atasy aqshany onyń apasyna qajetti medıtsınalyq qurylǵy alyp berý úshin jınap júrgen.
