Ispanııalyq ınvestorlar Mańǵystaýda kún jáne jel elektr stansasyn salmaq
AQTAÝ. QazAqparat - Mańǵystaý oblysynyń ákimi Eraly Toǵjanov Sistemecs Engineering and Construction kompanııasynyń ókilderimen kezdesti, dep habarlaıdy QazAqparat ákiminiń baspasóz qyzmetine silteme jasap.
Investorlar Mańǵystaýda birqatar jobalardy qarjylandyrýǵa nıetti.
«Investıtsııalyq saıasat - bul Elbasy Nursultan Ábishulynyń ustanǵan negizgi saıasattarynyń biri. Bizde erkin ekonomıkalyq aımaq alańy jumys isteýde. Atalǵan aımaqtyń sharttarymen jáne artyqshylyqtarymen tanysýdy usynamyn. Biz sizdermen osy baǵytta jumys isteýge árqashan daıynbyz. Búgin biz Systemecs Engineering and Construction kompanııasymen yntymaqtastyq týraly memorandýmǵa qol qoıdyq», - dedi oblys ákimi Eraly Toǵjanov.
Sistemecs Engineering and Construction kompanııasy óńirde birqatar jobalardy iske asyrý, qarjylandyrý jáne jabdyqtaý qyzmetin usynyp otyr. Olardyń qatarynda táýligine 10 myń tekshe metr teńiz sýyn tuşytatyn stansa qurylysy, 50 mVt balamaly elektr stansasyn (kún jáne jel energııasynan qýat alatyn) salý, Mańǵystaý, Atyraý, BQO, Aqtóbe oblystaryna, sondaı-aq kórshi memleketterge qyzmet kórsetýge arnalǵan aımaqtyq medıtsınalyq keshen qurylysy bar. 
