Ispanııalyq Hýan Hose Kobo - «Výelta-2011» velokópkúndiginiń jeńimpazy
ASTANA. 12 qyrkúıek. QazAqparat /Jasulan Amanbaıuly/ - Keshe úsh aptaǵa jýyq ýaqytqa sozylǵan «Výelta» velokópkúndigi óz máresine jetti.
Jarystyń sońǵy 21-kezeńinde slovakııalyq Peter Sagan («Liquigas») jeńiske jetti.
Al jalpy esepte «Geox-TMC» komandasynyń veloshabandozy Hýan Hose Kobo «Výelta-2011» kópkúndiginiń jeńimpazy dep tanyldy. Odan 13 sekýndqa qalyp kelgen ulybrıtanııalyq Hrıstofer Frým ekinshi oryn, 1 mınýttan astam ýaqytqa keshikken «tumandy albıonnyń» taǵy bir ókili Bredlı Ýıggıns úshinshi oryn ıelendi.
Klýbtyń kóshbasshysy Aleksandr Vınokýrov jaraqat alǵaly beri otandyq «Astana» komandasy bıylǵy maýsymda súreńsiz óner kórsetip júr. «Týr de Fransta» qanaǵattanarlyq nátıjelerge qol jetkizbegen bizdiń komandanyń «Výeltadaǵy» jetken eń joǵary kórsetkishi Robert Kıserlovskıdiń jalpy eseptegi 18-orny bolyp otyr. Sońǵy 4-5 jylda álemdegi eń myqty klýbtardyń biri atanyp kelgen «Astana» úshin bul maqtanarlyq meje emes ekeni anyq.
«Astana» veloshabandozdarynyń jalpy eseptegi ýaqyttary:
18. Robert Kıserlovskı (Horvatııa, «Astana») - 13,27
34. Fredrık Kesıakoff (Shvetsııa, «Astana») - 51,28
57. Hosep Hýfre (Ispanııa, «Astana») - 1:59:10
59. Andreı Mızýrov (Qazaqstan, «Astana») - 2:03:48
64. Tanel Kangert (Estonııa, «Astana») - 2:10:40
65. Evgenıı Petrov (Rossııa, «Astana») - 2:13:50
78. Enrıko Gasparotto (Italııa, «Astana») - 2:35:11
89. Andreı Kashechkın (Qazaqstan, «Astana») - 2:54:57
102. Aleksandr Dıachenko (Qazaqstan, «Astana») - 3:08:09.
