Ispanııalyq kompanııa Qyzylorda oblysyndaǵy zaýyt qurylysyna 44 mlrd teńge ınvestıtsııa salady

ASTANA. KAZINFORM – Qyzylorda oblysynda 44 mlrd teńgeden astam somaǵa zamanaýı sanıtarlyq-tehnıkalyq ónimdi óndirý jáne qurastyrý zaýytyn salýǵa arnalǵan ınvestıtsııalar týraly kelisim jasaldy.

Úkimettiń dereginshe, oǵan bir taraptan ónerkásip jáne qurylys mınıstri Ersaıyn Naǵaspaev pen Qyzylorda oblysynyń ákimi Nurlybek Nálibaev, ekinshi taraptan ıspanııalyq Roca Group kompanııasynyń enshiles kásiporny – «ROKA Qazaqstan» JShS bas dırektory Danıel Ernandes qol qoıdy.

Joba Prezıdenttiń óńdeýshi ónerkásipke ınvestıtsııalar tartý jáne ımportty almastyrý jónindegi maqsattarǵa qol jetkizý úshin lokalızatsııalaýdy arttyrý boıynsha qoıǵan mindetterine sáıkes júzege asyrylýda.

Zaýyt keramıkalyq sanıtarlyq ónimderdi, jýynatyn bólmelerge arnalǵan jıhazdardy jáne ózge de buıymdardy óndirýge jáne qurastyrýǵa mamandanatyn bolady. Qurylys jumystary 2026 jyldyń birinshi toqsanynda bastalady dep josparlanýda. Joba sheńberinde 300-ge jýyq jańa turaqty jumys oryndaryn ashý, sondaı-aq qazaqstandyq mamandardy oqytý jáne biliktiligin arttyrý kózdelgen.

Kásiporyn úderisterdi avtomattandyrýdyń joǵary deńgeıi bar jáne ekologııalyq qaýipsizdiktiń álemdik standarttaryna sáıkes keletin sanıtarlyq-tehnıkalyq ónimderdi shyǵarý boıynsha Qazaqstandaǵy alǵashqy óndiris bolmaq.

Jobalyq qýattylyǵy jylyna 500 myń buıymdy quraıdy. Shyǵarylatyn ónimdi Qazaqstannyń ishki naryǵyna jetkizý jáne Ortalyq Azııa elderine eksporttaý josparlanýda.

Zaýytty iske qosý qosylǵan quny joǵary ónim óndirisin ulǵaıtýǵa jáne Qazaqstannyń eksporttyq áleýetin keńeıtýge múmkindik beredi.

Aıta ketý kerek, ınvestıtsııalar týraly kelisim jasasý jospary Premer-mınıstr Oljas Bektenov pen Roca Group Dırektorlar keńesiniń tóraǵasy Santıago de Gomar Roktyń osy jyldyń maýsym aıyndaǵy kezdesýi barysynda talqylanǵan bolatyn. Osylaısha, qujatqa qol qoıylýy jáne jumystardyń bastalýy el ekonomıkasynyń ınvestıtsııalyq tartymdylyǵyn arttyrý jónindegi júıeli sharalardyń nátıjesin jáne ınvestorlar seniminiń joǵary deńgeıin kórsetedi.

Qujatqa qol qoıý barysynda Roca Group ókilderi Qazaqstan olar úshin strategııalyq mańyzdy naryq bolyp sanalatynyn atap ótti. Qazaqstandaǵy qolaıly ınvestıtsııalyq ahýalǵa oń baǵa berdi.

Roca Group – 100 jyldan astam tarıhy bar, santehnıkalyq jabdyqtardy óndirý salasyndaǵy álemdik kóshbasshylardyń biri. Kompanııa búkil álem boıynsha 78 óndiristik alańdy basqarady, onda 20 myńnan astam qyzmetker jumys isteıdi. Ónimderi 170-ten astam elge taraıdy jáne joǵary sapaly, ınnovatsııalyq sheshimder men eýropalyq standarttarǵa sáıkes bolǵany úshin keńinen tanymal.

Aıta keteıik, Jetisý oblysyna 397 mlrd teńge ınvestıtsııa tartylyp, 108,5 myń jumys orny ashyldy.