Ispanııalyq kompanııa Qazaqstannyń sý ınfraqurylymyn jańǵyrtýǵa atsalyspaq
ASTANA. KAZINFORM — Ispanııalyq kompanııa Qazaqstannyń sý ınfraqurylymyn jańǵyrtýǵa baǵyttalǵan ulttyq jobaǵa qatysýǵa daıyn. Bul týraly Úkimettiń baspasóz qyzmeti málim etti.
Álemdik naryqta sý tazartý jáne sýmen jabdyqtaý tehnologııalary salasyndaǵy iri oıynshy — Aqualia kompanııasy Qazaqstanda kárizdik tazartý kesheniniń qurylysy men jańǵyrtý jobalaryn júzege asyrýǵa qyzyǵýshylyq tanytty.
— Premer-mınıstrdiń orynbasary Qanat Bozymbaev delegatsııamen kezdesý ótkizdi. Kelissóz barysynda Aqualia kompanııasynyń Ortalyq Azııa boıynsha bas dırektory Hose Mıgel Santos Gonsales kásiporynnyń Eýropa, Latyn Amerıkasy, Soltústik Afrıka jáne Batys Azııanyń 18 elinde jobalardy júzege asyrý arqyly úlken halyqaralyq tájirıbege ıe ekenin atap ótti jáne Qazaqstannyń sý ınfraqurylymyn damytýǵa úles qosýǵa daıyn ekenin jetkizdi. Іske asyrylǵan jobalardyń biri — Grýzııanyń sý arnasyn jekeshelendirý men basqarýǵa qatysý jobasy, — delingen habarlamada.
Taraptar Energetıkalyq jáne kommýnaldyq sektorlardy jańǵyrtý jónindegi ulttyq joba aıasyndaǵy salanyń ınvestıtsııalyq áleýetin, otandyq óndirýshilerdi qoldaý jáne ózara yntymaqtastyqtyń basqa da múmkindikterin talqylady. Qanat Bozymbaev kompanııany elimizdegi kárizdik tazartý qurylystaryn salý jáne qaıta jańartý jobalaryna qatysý múmkindigin qarastyrýǵa shaqyrdy.
Kompanııanyń qarqyndy damyp jatqan qalalar men aglomeratsııalarda ınfraqurylymdyq jobalardy júzege asyrýǵa qatysý múmkindigin qarastyrý týraly sheshim qabyldandy. Aqualia Qazaqstanda jobalardy uzaq merzimdi negizde júzege asyrý úshin óz tájirıbesin jáne tehnologııalaryn bólisýge daıyn ekenin rastady.
Eske sala keteıik, buǵan deıin Qanat Bozymbaev «Energetıka jáne kommýnaldyq sektorlardy jańǵyrtý» Ulttyq jobasyn júzege asyrý barysyn teksergenin jazǵan edik.