Ispanııalyq fýtbolshy «Astana» sapyn tolyqtyrady
ASTANA. KAZINFORM — Grekııalyq «Lamııa» komandasynyń ıspanııalyq shabýylshysy Karlıtos taıaýda «Astana» komandasymen kelisimshartqa otyrady.
Gooal.kz sport portalynyń jazýynsha, fýtbolshy elordalyq klýb sapynda 2025 jyldyń mamyryna deıin óner kórsetpek.
«Astananyń» sport dırektory Igor Pavlıýk ıspanııalyq shabýylshy Karlıtostyń elordalyq komandaǵa aýysýy týraly aqparatqa túsinikteme berdi.
«Shynymen de Karlıtos «Astana» fýtbol klýbyna aýysady. Barlyq másele egjeı-tegjeıli sheshildi, shabýylshymen kelisimshart osynda kelgennen keıin jasalady. Onyń tájirıbesi men aıaqdopshy retindegi jeke qasıetteri komandaǵa 2024 jylǵy maýsymdaǵy basty máselelerdi sheshýge – «Astanaǵa» chempıondyq tıtýldy qaıtarýǵa jáne eýrokýbok oıyndarynda sátti óner kórsetýge kómektesýi kerek. Ispanııalyq aıaqdopshymen kelisimshartqa 2025 jyldyń mamyryna deıin, ıaǵnı, bir jyldan sál artyq merzimge otyramyz», - dedi ol.
Sondaı-aq elordalyq klýbtyń sport dırektory fýtbolshynyń qazaqstandyq komandada alatyn jalaqysyna qatysty BAQ-ta jarııanǵan aqparattyń shyndyqqa janaspaıtynyn jetkizdi.
Ótken maýsymda 33 jastaǵy Karlıtos «Lamııa» sapynda 21 match ótkizip, 10 gol soǵyp, 4 nátıjeli paspen kózge túsken.
