Ispanııalyq fýtbol klýbynyń shabýylshysy match kezinde alǵan jaraqattan keıin kóz jumdy
ASTANA. KAZINFORM — Ispanııanyń «Tenerıfe» klýbynyń shabýylshysy Hesýs de Mıgel 30 jasynda qaıtys boldy. Ol fýtbol matchy kezinde júregi toqtap qalǵannan keıin aýrýhanada kóz jumdy. Bul týraly klýbtyń baspasóz qyzmeti habarlady.
Klýbtyń málimetinshe, fýtbolshy 3 qarasha kúni tańerteń qaıtys bolǵan. Komanda marqumnyń týǵan-týystary men jaqyndaryna, sondaı-aq ony tanıtyn barsha janǵa kóńil aıtty.
Qaıǵyly oqıǵa 2 qarashada Ispanııa chempıonatynyń ekinshi dıvızıony aıasynda ótken «Tenerıfe» men «Andorra» komandalarynyń matchynda boldy. Cope basylymynyń habarlaýynsha, de Mıgel qarsylas komandanyń qaqpashysy Hesýs Ovonomen soqtyǵysyp, alańǵa qulaǵan.
Medıtsınalyq top shabýylshyǵa birneshe mınýt boıy alańda alǵashqy kómek kórsetti. Keıin ony shuǵyl túrde aýrýhanaǵa jetkizgen. Alaıda dárigerler fýtbolshynyń ómirin saqtap qala almady.
Aıta keteıik, Hesýs de Mıgel «Tenerıfe» klýbyna 2025 jyly qosylǵan. Buǵan deıin Ispanııanyń «Kastelon», «Ýnıonıstas» jáne «Fýenlabrada» komandalarynda óner kórsetken.
Eske salaıyq, buǵan deıin Rızabek Aıtmuhannyń álem chempıonatynda alǵan jaraqatyna qatysty tyń derek shyqqan edi.
